Таможня службин хисеплĕ сотрудникĕсем тата ветеранĕсем!

Сире професси уявĕ ячĕпе саламлатăп!

Таможня органĕсем патшалăхăн экономика интересĕсене хӳтĕлессипе, çирĕп аталану условийĕсем йĕркелессипе, çĕршывăмăр конкурентлăхне çирĕплетессипе çыхăннă пысăк пĕлтерĕшлĕ те яваплă тивĕçе пурнăçлаççĕ.

Таможня службин сотрудникĕсен профессионализмĕ, компетентлăхĕ тата оперативлăхĕ çĕршыва кӳрекен продукци пахалăхĕпе хăрушсăрлăхне, таможня тӳлевĕсене патшалăх хыснине вăхăтра хывнине шанчăклă тĕрĕслесе тăма май параççĕ. Кăçалхи 9 уйăхра Чăваш таможня посчĕ бюджета 1 миллард тенкĕ куçарнă.

Таможня сотрудникĕсем çĕнĕ йышши технологисене çине тăрса ĕçе кĕртеççĕ, автомат мелĕпе регистрациленĕ тата кăларнă декларацисен тӳпи пысăкланса пырать. Ĕçĕн çĕнĕ йышши меслечĕсемпе формисем таможня процедурисене пурнăçламалли вăхăта кĕскетеççĕ.

Таможня службин сотрудникĕсемпе ветеранĕсене принциплăхшăн, йĕркене пăснипе çырлахманшăн, професси тивĕçне парăннăшăн тата тӳрĕ кăмăлпа пурнăçланăшăн чунтан тав тăватăп. Çирĕп сывлăх, ĕçре малашне те ăнăçу, телей тата ырлăх сунатăп!

Чăваш Республикин Пуçлăхĕ                                              Михаил Игнатьев