Правительство членĕсемпе эрнесерен пулакан планеркăра уй-хир ĕҫĕсене тарăн сӳтсе явнă
Юпа уйăхĕн 7-мĕшĕнче Чăваш Республикин Министрсен Кабинечĕн Председателĕ Иван Моторин Правительство членĕсемпе эрнесерен пулакан планеркăна ирттернĕ. Ĕҫе пухăннисем уй-хир ĕҫĕсене тарăн сӳтсе явнă. Чăваш Республикин Ял хуҫалăх министерстви пĕлтернĕ тăрăх, регионта пурĕ 712 пин тонна тыр-пула тĕшĕленĕ, пĕр гектартан тухăҫа 27 центнер пухса илнĕ.
Республикăра 9 районта ҫĕр улмине тĕпрен пухса кĕртнĕ. Хăш-пĕр хуҫалăхсен 700 га тухăҫа пуҫтарса илмелли паянхи куна тăрса юлнă-ха.
Чăваш Республикин Министрсен Кабинечĕн Председателĕн ҫумĕ – ял хуҫалăх министрĕ Сергей Артамонов хăйĕн сăмахĕнче хăш-пĕр хуҫалăхсенче ҫĕр ĕҫченĕсем тавар илемлĕ упрантăр тесе комбайн пур ҫĕртен алăпа пуҫтарма кăмăл тунине хыпарланă, 1 кг ҫĕр улмине халăх 6-7 тенкĕпе туянать тенĕ вăл сăмаха малалла тăснă май.
Вăрнар районĕнче кукурузăна 66 га пуҫтарса илнĕ, пĕтĕмпе 479 тонна тĕшĕленĕ. Пахча-ҫимĕҫе 259 га пухса кĕртнĕ. Палăртмалла кăҫал тыр-пул, пахча ҫимĕҫ пĕлтĕрхинчен самай чаплă, тухăҫ пысăк пулни те куҫкĕретех. Кăтарту 2 хут пысăк тесе ҫирĕплетеҫҫĕ специалистсем. Хуҫалăхсм кĕрхисене 92 пин га ҫинче ӳсен-тăран курăкне акса хăварма та ĕлкĕрнĕ. Силос хатĕрлессипе те ҫĕр ĕҫченĕсем ырми-канми тăрăшаҫҫĕ. Пурĕ 104 пин тонна утă хатĕрленĕ выльăхсене валли. Сенаж – 293,2 пин тонна, силос вара пĕтĕмпе 230,7 пин тонна. Куславккара, Муркашра, Вăрмарта выльăхсене валли ятарлă ҫăнăх хатĕрлессипе тимлеҫҫĕ.
«Нимĕн те пăшăрханма кирлĕ мар, пĕтĕмпех планпа килĕшӳллĕн пулса пыраҫҫĕ ĕҫсем», – тесе каланă ял хуҫалăх министрĕ.
Мускавра юпа уйăхĕн 9–12-мĕш кунĕсенче Ылттăн кĕркунне Пĕтĕм Раҫҫей шайĕнче XXI-мĕш курав иртет. Ăна валли регионтан сумлă делегаци кайма хатĕрленнине хыпарланă вăл сăмаха ҫавăрса. Делегаци Чăваш Республикин Пуҫлăхĕ Михаил Игнатьев хушăвĕпе килĕшӳллĕн ĕҫлĕ ҫул ҫӳреве тухать. «Ылттăн кĕркунне – 2019» куравра ертӳҫĕсем пĕр-пĕринпе килĕшсе ĕҫлемелли ĕҫ хучĕсене те алă пусса ҫирĕплетме тĕллев лартнă.