Чăваш Енре Ял хуçалăх тата тирпейлекен промышленноç ĕçченĕсен кунне паллă тунă
Шупашкарта Ял хуçалăх тата тирпейлекен промышленноç ĕçченĕсен кунне паллă тунă, уяв чӳк уйăхĕн 1-мĕшĕнче иртнĕ. Уява кашни район аграрийĕсен делегацийĕ хутшăннă. Савăнăçлă пухăва уçиччен «Шупашкар-Арена» керменте хăнасене тирпейлекен промышленноç предприятийĕсем хатĕрлекен продукцие кăтартнă. Вĕсем: Чувашпотребсоюз», «Акконд», «Чебоксарский мясокомбинат», «Моргаушское яйцо», «Ядринмолоко», «Вурнарский мясокомбинат», «Хлеб» АУО. Вĕсемпе Чăваш Ен Пуçлăхĕ Михаил Игнатьев паллашнă, паха апат-çимĕçшĕн ертӳçĕсемпе ĕç коллективĕсене тав тунă.
Ҫĕр ĕҫченĕсене, ял хуҫалăх пайĕнче вăй хуракансене чи малтан професси уявĕпе Чăваш Республикин Пуҫлăхĕ Михаил Игнатьев ăшшăн саламланă, агропромышленноçра нумай çул ĕçленисен, пысăк ӳсĕм тунисен пĕр ушкăнне патшалăх тата ведомство наградисене парса хавхалантарнă, чăваш эстрада ҫăлтăрĕсем пухăннă халăха хаваслă юрă-кĕвĕ парнеленĕ.
Чăваш Республикин Министрсен Кабинечĕн Председателĕн ҫумĕ – ял хуҫалăх министрĕ Сергей Артамонов кăçал ял хуçалăх культурисем туса илессипе тата вĕсене пухса кĕртессипе, апат-çимĕç хатĕрлессипе, ăна çĕршывра тата чикĕ леш енче сутассипе пурнăçлакан ĕçсем çинчен каласа кăтартнă. Атăлҫи федераци округне кĕрекен регионсем хушшинче Чăваш Ен малтисен ретĕнче тăнине, республикӑри ҫӗр ӗҫченӗсем сӗт, аш-какай, пахча ҫимӗҫ, ҫӗр улми, ҫу паракан культурӑсем туса илессине ӳстерсе пынине, хуҫалӑхсенче малта пыракан технологисене, производствӑпа тирпейлес ӗҫри лайӑх мелсене ӗҫе кӗртнине, ку чухнехи пысӑк тухӑҫлӑ техника туяннине, инвестици проекчӗсене ӑнӑҫлӑн пурнӑҫланине, ҫӗнӗ ӗҫ вырӑнӗсем йӗркеленине каланă.
«2018–2019-мĕш ҫулсенче кĕркуннепе хĕлле лăпкă пулманнине кура, аграри тытăмĕнче тăрăшакансем чылай йывăрлăхсем туйнă. Пур-пĕрех ҫĕр ĕҫченĕсем парăнман, йывăрлăхсене ҫĕнтернĕ», – тесе асăннă Чăваш Енĕн ял хуҫалăх ертӳҫи.
Ял хуҫалăх пайĕнче тăрăшакансен ĕҫне пысăка хурса хакланă Чăваш Республикин Пуҫлăхĕ Михаил Игнатьев.
«Хресчен ӗҫӗ нихӑҫан та ҫӑмӑл пулман, ҫавна пӑхмасӑр вӑл хӑйӗн хисеплӗхӗпе тата пурнӑҫра питех те кирлӗ пулнипе палӑрса тӑрать. Ҫӑкӑр ҫитӗнтерме тӑрӑшуллӑ та ӗҫчен ҫынсем ҫеҫ – тӑван ҫӗре пӗтӗм чунтан парӑннисем тата ӑна никамран ытла юратакансем – пултараҫҫӗ. Чӑваш Республикин ҫӗр ӗҫченӗсен пултарулӑхӗпе ӗҫченлӗхне тата ырми-канми тӑрӑшулӑхне пула кӑҫалхи ял хуҫалӑх тапхӑрне тивӗҫлӗ кӑтартусемпе вӗҫленӗ», – тенĕ вăл сăмаха ҫавăрса.
«Чăваш Енĕн ҫĕр ĕҫченĕсене саламламалли вăхăт ҫитрĕ. Тайма пуҫ сире аграри тытăмĕнче тăрăшакансене! Эсир чăннипех те ĕҫлеме пĕлеттĕр. Ыттисемшĕн паха тĕслĕхре», – палăртса каланă Ертӳҫĕ. АПК пайĕнче тимлекенсемпе яланах калаҫма кăмăллă пулнине, ырă туйăмсем парнеленине, чун-чĕре хавхаланса кайнине те асăннă вăл. Мӗнпур ҫӗр ӗҫченне, механизаторсемпе выльӑх-чӗрлӗх ӗрчетекесене, тирпейлекен предприятисен ӗҫченӗсене ҫӗршывӑн апат-ҫимӗҫ хӑрушсӑрлӑхӗпе ҫыхӑннӑ тӗллеве тухӑҫлӑн татса пама пулӑшнӑшӑн тав тунă регион Пуҫлăхĕ. Республикӑри пӗтӗм ял хуҫалӑх таварӗсем туса илекене ӑнӑҫлӑ аталану, ырлӑх, ҫӗнӗ ҫитӗнӳсем суннă.
Палăртмалла, Чăваш Енри ял хуҫалăх пайĕнче тăрăшакансем тĕнчери 31 ҫĕршыва экологи тĕлĕшĕнчен паха таварсемпе тивĕҫтереҫҫĕ. Пирĕн хуçалăхсемпе тирпейлекен промышленноç предприятийĕсем туса илекен тата кăларакан продукцие туянакан патшалăхсен шучĕ ӳссех пырать.
