Паян Шупашкарта Чăваш Республикин Муниципалитет йĕркеленĕвĕсен VII съезчĕ иртрĕ. Раштав уйăхĕн 6-мĕшĕнче Чăваш Республикин Пуҫлăхĕ Михаил Васильевич Игнатьев республикăри Муниципалитет пĕрлешĕвĕсен съезд ĕҫне хутшăннă. Паллă пулăма паян Чăваш Республикин Прокурорĕ Василий Пословский, Чăваш Республикин Министрсен Кабинечĕн Председателĕн ҫумĕ – Чăваш Республикин Пуҫлăхĕн Администрацийĕн Ертӳҫи Юрий Васильев, Раҫҫей Федерацийĕн Федераци Канашĕн членĕ Вадим Николаев, Раҫҫей Федерацийĕн Патшалăх Думин депутачĕсем Леонид Черкесов тата Николай Малов, министерствăсен ертӳҫисем, район тата хула администрацийĕсен пуҫлăхĕсем, ял тăрăхĕсен ертӳҫисем тата та ытти ҫынсем чылай пуҫтарăннă.  

Республика Пуҫлăхĕ Михаил Васильевич Игнатьев хăйĕн сăмахĕнче 2019-мĕш ҫула тивĕҫлĕ шайра вĕҫлесе пынине хыпарланă.  Республикăн кăтартăвĕсем Раҫҫей шайĕнче лайăх тесе асăннă.  Районсемпе хуласем курăмлă аталаннине, федераци, республика программисемпе, наци проекчĕсемпе туллин ĕҫленине пĕлтернĕ вăл.  Республикăра социаллă пурнăҫпа экономика хăватлă аталанса пыни куҫкĕретех тенĕ Ертӳҫĕ.  Ҫурт-йĕрсем хута каяҫҫĕ, ҫĕнĕрен те ҫĕнĕ шкулсем ҫĕкленеҫҫĕ, ача сачĕсем, сывлăх сыхлавĕн учрежденийĕсем вăй илсе пыраҫҫĕ. Спорт, культура енĕпе ытти регионсемпе танлаштарсан пирĕн кăтартусем ҫӳллĕ шайра тенĕ вăл.  Ҫулсене сарас ĕҫ те курăмлăн пулса пырать. Халăх кăмăллă, пурăнма условисем лайăхланса пыни ĕҫлеме тата та хавхалантарать пурсăмăра та. Регионта хулан хутлăхне хăтлăлатасси ыйту ҫине пысăк тимлĕх уйăрни никамшăн та вăрттăнлăх мар. Ҫакнах Раҫҫей Федерацийĕн Строительство министерстви те ҫирĕплетнĕ.  Атăлҫи федераци округĕнче ку тĕлĕшпе республика малти вырăнта.

Тепĕр ырă хыпар пирки те паян чарăнса тăнă канашлура республика Пуҫлăхĕ Михаил Васильевич Игнатьев.

 Раҫҫей Федерацийĕн Правительстви 2019 ҫулта пысăк должноҫри ҫынсем  тухăҫлăхне тата ĕҫ тăвакан влаҫ органĕсен ҫитĕнĕвĕсене хакланă, пĕтĕмлетӳ тунă хыҫҫăн Раҫҫей Федерацийĕнчи субъектсене пĕтĕмпе 45 миллиард тенкĕллĕх грантcем пайласа пама йышăннă.  Ҫак пысăк тĕреве лайăх ĕҫлекен регионсене уйăрса панă. Пĕтĕмлетӳ рейтингĕнче 1-мĕш вырăнтан пуҫласа 50-мĕш вырăна тухнисене ҫеҫ пулăшу тивнĕ.  Чăваш Ен рейтингра хисеплĕ 17-мĕш вырăна тухнă. Федераци бюджетĕнчен Чăваш Республики 958 миллион та 686 пин тенкĕ илет.  Палăртма кăмăллă, Чăваш Республикин Пуҫлăхĕн Михаил Васильевич Игнатьевăн тата Чăваш Республикин Правительствин ĕҫне РФ Правительстви ҫав тери пысăк хак панă. Ку вара мĕнпур халăха, регионта пурăнакансене малашне те ҫитĕнӳсемпе ĕҫлеме тата та вăйлăрах хавхалантарса пырать.   

 Раҫҫейри чи ăнăҫлă ĕҫлесе пыракан ТОП -20 регионне кĕнĕ Чăваш Республики.

Укҫа-тенкĕ тавралăха тирпей-илем кĕртме тăкакланасси паллă.  «2020-мĕш ҫулта ялсене хăтлăлатма, тирпей-илем кĕртме 1,5 миллиард уйăрма пăхса хăварнă. Апла пулсан, мĕнпур муниципалитетсен проектсене вăхăтра хатĕрлесе ҫитермелле. Объектсене тирпей-илем кĕртесси ĕҫ хутне епле пурнăҫласа пынинчен те чылай килет. Вăхăта вăраха тăсса ĕҫлеме юрамасть», - тесе асăрхаттарнă Чăваш Ен Пуҫлăхĕ Михаил Васильевич Игнатьев. Сăмах май, регионта мĕнпур хуласемпе районсене вăй илсе аталанса пыма пĕр тан условисем хатĕрленсе пынине асăннă вăл. Калăпăр, кăҫал республика бюджетĕнчен пĕлтĕрхинчен укҫа чылай куҫарнă. Кăтарту 5 млрд 549 млн танлашать. Наци проекчĕсемпе ĕҫлеме вара муниципалитет пĕрлешĕваĕсем валли – 16 млрд ытла укҫа уйăрнă.

«Ҫав тери пысăк тĕрев куҫать муниципалитетсене. Укҫапа тĕллевлĕн тата тухăҫлă усă курса пыма пĕлмелле. Халăхăн пурнăҫ условийĕн шайне лайăхлатассишĕн пурин те ырми-канми тăрăшмалла, ҫитĕнӳсем патне ăнтăлассишĕн ĕҫлемелле», - тенĕ регион Пуҫлăхĕ.

Паян ларура пуласлăхри тĕллевсем пирки те сăмахланă.   Влаҫ тата бизнес хушшинчи ĕҫлĕ  ҫыхăнусене сарассине тишкернĕ.  Вак тата вăтам предпринимательлĕх пайĕ валли кирлĕ пек условисем хатĕрлесе тăратмалли пирки те сăмах пуҫарнă.  Пысăк технологиллĕ ĕҫ вырăнĕсем граждансем валли хатĕрлесе тăратмаллине, ҫынсен тупăш пайне ӳстерсе пыма витĕм кӳрекен майсем шырамаллине асăннă республика Пуҫлăхĕ Михаил Игнатьев.

Паянхи пурнăҫ таппинче тухса тăракан ыйтусем те кун йĕркинчех тăнă. Йăлари хытă каяшсене пухса тирпейлесси, халăхăн сĕнĕвĕсене шута илсе пруҫаруллă проектсене пурнăҫа кĕртсе пырасси те ҫивĕч ыйтусемпех пулса тăраҫҫĕ.  Республика Пуҫлăхĕ час-часах «тӳрĕ лини» эфира тухать. Унта халăх хăйсене пăшăрхантаракан ыйтусене пама тăрăшать. Хăшĕ-пĕрисем тӳрремĕнех вырăнти хăй тытăмлăх органĕсене пырса тивеҫҫĕ. Апла пулсан, кашнин ыйтусем ҫине тимлĕх уйăрма пĕлмелле, вĕсене ҫийĕнчех татса парассишĕн тăрăшмалла тенĕ республика Пуҫлăхĕ.  Ача сачĕсенче ăшăпа ҫителĕклĕ таран тивĕҫтерменни – ашшĕ-амăшĕсене, паллах пăшăрхантарать. Кун пирки вĕсем хыпарсене пĕлтерсех тăраҫҫĕ. Атлашри лару-тăрăва тĕплĕнрех пĕлес тесе республикăри прокуратура ĕҫченĕсемпе пĕрле вырăна тухса тĕрĕсленĕ ĕнер. Кун пек пăтăрмахсем пулмалла мар, социаллă объектсенче тирпейлĕх тата йĕрке хуҫаланмалла тенĕ Пуҫлăх.  Кун йĕркине кĕртнĕ тĕп ыйтупа Чăваш Риспубликин муниципалитет пĕрлешĕвĕсен канашĕн Правлени председателĕ, Элĕк районĕн администрацийĕн пуҫлăхĕ Александр Куликов тарăн доклад туса панă.  Патшалăх программисем пирки чарăнса тăнă, халăхăн пуҫаруллă проекчĕсем епле пурнăҫа кĕрсе пыни ҫинчен каласа кăтартнă.  

Паян мероприятинче Чăваш Республикин Пуҫлăхне Михаил Васильевич Игнатьева Раҫҫей Федерацийĕн вырăнти хăй тытăмлăх органĕсене  аталантарас ĕҫе пысăк тимлĕх уйăрнăшăн РФ муниципалитет пĕрлешĕвĕсен Пĕтĕм Раҫҫейри Конгресĕн хисеп паллипе чысланă.  РФ Конгрес Президенчĕн, РФ Патшалăх Думинчи «Пĕрлĕхлĕ Раҫҫей» политика партийĕн ертӳҫин ҫумĕн Виктор Кидяевăн Тав ҫырăвне вуласа панă паянхи ларăва пухăннисем умĕнче. Шăпах та, вăл Тав сăмахĕнче Чăваш Республикин Пуҫлăхне Михаил Всильевич Игнатьева тата Правительство членĕсене, Чăваш Республикин Патшалăх Канашĕн Председательне Альбина Егоровăна  мухтанă, тивĕҫлĕ шайра ĕҫлесе пынăшăн тав тунă.  

Яланхиллех мухтава тивĕҫнисене съездра патшалăх наградисене парса хавхалантарнă.   

Фоторепортаж