Чăваш Республикин Пуçлăхĕ Михаил Игнатьев Культура ӗҫченӗсен кунӗ ячӗпе саламлани
Чӑваш Республикин культурӑн хисеплӗ ӗҫченӗсем!
Отраслӗн хаклӑ ветеранӗсем!
Сире професси уявӗ ячӗпе саламлатӑп!
Культура обществӑна тачӑрах пӗрлештерме пулӑшать, унӑн ӑс-хакӑл аталанӑвне тата наци хӑй евӗрлӗхне палӑртать.
Сирӗн хастар та тӑрӑшуллӑ ӗҫӗре пула ҫынсем пултарулӑх ырлӑхӗпе савӑнма пултараҫҫӗ, илемлӗхе хаклама вӗренеҫҫӗ, Раҫҫей халӑхӗсен пуян еткерлӗхӗпе, сайра йышши йӑли-йӗркипе туллин паллашаҫҫӗ.
Чӑваш Республикинче культурӑна аталантарасси, ӑс-хакӑлпа пурлӑх пуянлӑхне тивӗҫлипе сыхласа упрасси, пултаруллӑ ҫынсене хавхалантарса тата пулӑшса пырасси тӗп ҫул-йӗрсен шутӗнче. Ҫав тӗллевсене пурнӑҫламашкӑн культура учрежденийӗсен пурлӑхпа техника никӗсӗ ҫирӗпленет, регионта пурӑнакансен культурӑллӑ канӑвне тивӗҫтерме тата вӗсене хӑйсен ӑсталӑхӗпе туллин усӑ курма май паракан ку чухнехи инфратытӑм йӗркеленет, пултарулӑхпа ҫыхӑннӑ ҫӗнӗ проектсене укҫа-тенкӗпе грант пулӑшӑвӗ майӗпе тивӗҫтересси вӑй илет. Пысӑк ӑсталӑхлӑ специалистсене вӗрентсе хатӗрлесси, культура ӗҫченӗсен социаллӑ хӳтлӗхне ӳстересси ҫине уйрӑмах тимлӗн пӑхатпӑр.
2019 ҫула Раҫҫейре Театр ҫулталӑкӗ тесе пӗлтернӗ. Сцена искусствине халӑх хушшинче анлӑрах сарас тӗллевпе пурнӑҫлама палӑртса хунӑ масштаблӑ ӗҫсем Чӑваш Енри театр пурнӑҫне ҫӗнӗ шая ҫӗклеме пулӑшасса ҫирӗппӗн шанса тӑратӑп.
Культурӑпа искусство ӗҫченӗсене професси ӑсталӑхӗшӗн тата юратнӑ ӗҫе парӑннӑшӑн пӗтӗм чунтан тав тӑватӑп. Сире ҫирӗп сывлӑх, телей, пултарулӑх ӗҫӗнче хавхаланупа ҫитӗнӳсем, интереслӗ ҫӗнӗ проектсене ӑнӑҫлӑн пурнӑҫлама сунатӑп!
Чӑваш Республикин Пуҫлӑхӗ Михаил Игнатьев