Ҫĕртме уйăхĕн 19-мĕшĕнче Правительство ҫуртĕнче наркотика хирĕҫ кĕрешессипе ĕҫлекен комиссийĕн черетлĕ ларăвне ирттернĕ. Видеоконференцçыхăнăва республикăри район тата хула администрацийĕсен пуҫлăхĕсем хутшăннă. Ларăва яланхиллех Чăваш Республикин Пуҫлăхĕ Михаил Игнатьев ертсе пынă.  

Комисси ĕҫне пухăннисем ҫамрăксем хушшинче ытларах профилактика ĕҫне йĕркелемелли пирки сӳтсе явнă. Пушă вăхăта ачасен тивĕҫлĕ ирттермелли ҫинчен те сăмах пуҫарнă. Ҫул ҫитменнисем тепре чухне усал ĕҫ тума шухăш тапратаҫҫĕ, апла пулсан вĕсене те куҫран вĕҫертме юраманнине асăрхаттарнă регион Пуҫлăхĕ.  

Ыйту чăннипех те питĕ ҫивĕч тăнине тепĕр хут асăннă республика Ертӳҫи. Кăҫал пиллĕк уйăх хушшинче, ҫула ҫитмен ҫамрăксем йĕрке пăснă тĕслĕхсен шучĕ 1,4 процент чухлĕ чакнине асăннă комисси членĕсем. Ҫуллахи тапхăрта ачасен пушă вăхăт чылай, ҫавăнпа та вĕсене ырă ĕҫсем тума вĕрентмелле, обществăлла пурнăҫа явăҫтармалла.  

Халăх хушшинче наркăмăш-наркотик сарăлассинчен пурин те сыхă тăмалла, хыпарсем тепре чухне Интернет урлă ҫынсем патне ҫиткелеме пултараҫҫĕ. Пирĕн тĕллев – сывă пурнăҫ пирки ытларах граждансене ăнлантарса парасси, усал ĕҫсем патне туртăнакансене пурнăҫăн паха енĕсем ҫинчен каласа кăтартасси тенĕ Чăваш Ен Пуҫлăхĕ Михаил Игнатьев хăйĕн сăмахĕнче. «Ачасене ĕҫе явăҫтармалла. Хăйсен кăмăлне каякан мероприятисем яланах пысăк витĕм кӳреҫҫĕ ăс-хакăл тĕнчине пуянлатассинче», – тенĕ сăмаха ҫавăрса регион Пуҫлăхĕ.

Чăваш Республикин вĕренӳ тата ҫамрăксен политикин министрĕ Сергей Кудряшов шăпăрлансем йĕрке пăснă тĕслĕхсем тупăнкаласах пыраҫҫĕ тенĕ, кăтарту кăҫал 5 уйăхра ӳсни курăнать – 38,5 процент хăпарчĕ тенĕ. Наркăмăша ҫула ҫитмен ачасем тепре чухне халăх хушшинче сарма тăрăшни те сисĕнкелет тенĕ вăл. Ытларах шăпăрлансем Ҫĕнĕ Шупашкарта, Шупашкарта, Сĕнтĕрвăрринче алхаснине хыпарланă вĕренӳ министрĕ.   Çул çитменнисемпе тата çамрăксемпе вĕреннĕ вăхăтра, уроксем хыççăн наркотиксене хирĕç туса пыракан профилактика ĕç-хĕлне лайăхлатасси çинчен тĕплĕн каласа панă ведомство ертӳҫи хăйĕн сăмахĕнче.  

Чăваш Енри Шалти ĕҫсен министерствин ĕҫченĕсем те тăтăшах халăх йĕрке пăсассинчен сыхă тăраҫҫĕ. Наркотика ҫынсем хушшинче сарассине хирĕҫ кĕрешессипе те кулленех ҫирĕп тĕрĕслесех пыраҫҫĕ ятарлă специалистсем. Палăртнă ведомствăра наркотиксен çаврăнăшне сăнакан управлени пуçлăхĕ Данис Шакуров ыйтăва тĕплĕнрех уҫăмлатнă. Йĕрке пăсакансене ҫийĕнчех тупса палăртнине, явап тыттарнине пĕлтернĕ вăл. 16-17 ҫулхи ҫамрăксем усал ĕҫсем патне туртăнни сисĕнет тенĕ управлени пуҫлăхĕ. Административлă право йĕркине пăснă наркоманипе чирлĕ çынсене сипленме, çавăн пекех медицина тата социаллă реабилитаци ĕçне явăçтармалли механизмсене пурнăçа кĕртнин тухăçлăхĕ çинчен каласа кăтартнă вăл.

Профилактика ĕҫĕ тĕп вырăнта пулмалла. Видеосăнавсем ытларах вырнаҫтармалла. Сайтсене ҫирĕп тĕрĕслевре тытмалла. Ҫуллахи вăхăтра, йывăр ҫемьесенче ӳсекен ҫамрăксене, тăтăшах тĕрĕслемелле, вĕсемпе уҫă калаҫусем ирттермелле, тӳрĕ ҫул ҫине тăма витĕм кӳрекен мероприятисене явăҫтармалла.

Усалтан сыхламалли тухăçлă çул-йĕр шутĕнче вĕсен пушă вăхăтне усăллă ирттерме майсем туса парассине палăртнă ертӳҫĕсем. Ку енĕпе спорт, пултарулăх учрежденийĕсен ĕçĕ уйрăмах пысăк пĕлтерĕшлĕ. Вĕсем çул çитменнисене сывă пурнăç йĕркине хисеплеме хăнăхтараççĕ, çитĕнӳсем патне ăнтăлма вĕрентеççĕ. Енчен те ҫамрăксем усал ĕҫсем тума пуҫланă пулсан, туххăмрах тупса палăртмалла, ашшĕ-амăшĕсене хыпарламалла, тĕллевлĕ калаҫусем ирттермелле тесе ҫирĕппĕн асăрхаттарнă регион Пуҫлăхĕ.  Ларура Куславкка, Пăрачкав районĕсенчи наркотиксемпе кĕрешекен комиссисен ĕç-хĕлне пăхса тухнă.  

Фоторепортаж