Ҫĕртме уйăхĕн 22-мĕшĕнче Чăваш Республикин Пуҫлăхĕ Михаил Игнатьев Шупашкарта Хĕрлĕ тӳремре регионсен хушшинчи «Регионсем - чикĕсĕр килĕштерсе ĕçлесси» XXVI курава çитсе курнă.

Чăваш Республикин Пуҫлăхĕ Михаил Игнатьев экспозицисемпе кăсăкланнă, вĕсен илемлĕхне курса тĕлĕннĕ. Чăвашпотребпĕрлешĕвĕн председателĕ, Чăваш Республикин Патшалăх Канашĕн депутачĕ Валерий Павлов хăнасене ҫĕнĕ таварĕсемпе паллаштарнă, регион Ертӳҫине Михаил Игнатьева пылак шĕвексен пахалăхĕ пирки каласа кăтартнă, сывă апатланушăн таварсем питĕ вырăнлă тесе асăннă ертӳҫĕ.  Раҫҫейре ирттернĕ конкурсра кăҫал палăртнă предприяти малти вырăна тухнă, экономика ăмăртăвĕнче ыттисемшĕн ырă тĕслĕхе кĕрсе юлнă. Регион Ертӳҫи кооперативра ĕҫлекенсене ӳлĕмрен те пысăк ҫитĕнӳсемпе палăрма чĕнсе каланă.

Куравра чи нумай предприятисем Шупашкартан пулнă, вĕсен паха таварĕсем халăхăн кăмăлне кайнă. Паллă, Шупашкар хулине 550 ҫул, ăна халалласа организацисем хăйсен ҫитĕнĕвĕсемпе халăха туллин паллаштарма тăрăшнă.   Авалхине те манман, ҫĕннине те чылай вырнаҫтарнă куравсенче. Кашнин хăйĕн илемлĕхĕ, пахалăхĕ. Ертӳҫĕсем граждансемпе курнăҫнă, вĕсене кăсăклантаракан ыйтусем ҫине хурав панă. Текстильщик микрорайонта пурăнакан Эльвира Маркова Михаил Игнатьева тата республика Правительствинче ĕҫлекенсене пурне те мухтанă, регионта тавралăха тирпей-илем кĕртес ĕҫе пысăк витĕм кӳнине асăннă. Республикăра нумай хваттерлĕ ҫуртсем таврашĕнче илемлĕх хуҫаланнине тепĕр хут ҫирĕплетсе каланă хăйĕн сăмахĕнче хĕрарăм.

Курава пурĕ 100 ытла организаци хутшăнма кăмăл тунă. Вĕсенчен кашни хăйсен ҫитĕнĕвĕсем пирки каласа кăтартма пикеннĕ. Строительство, архитектура, электротехника, хими, промышленноҫ, ял хуҫалăхĕпе туризм, спорт, культура яланхиллех малти вырăнта тăнă. Сывлăх сыхлавĕ, вĕренӳ, транспорт енĕпе те чылай ҫĕнĕлĕхсем пулнă.  

Чăваш Республикин Пуçлăхĕ малтан Чăваш наци музейĕ умне тăратнă, тĕрлĕ отрасльте усă куракан техникăпа, кайран 1800 тăваткал метр лаптăк йышăнакан шатера кĕрсе тăватă рете вырнаçтарнă экспозицисемпе паллашнă. Кашнипе тенĕ пекех кăсăкланнă, вăл е ку предприяти паха продукци туса кăларнине палăртнă.    

Сумлă хăнасем чылай пуҫтарăннă. Раҫҫейри индустри паркĕсен Асоциацийĕн представителĕ, Япони, ют ҫĕршывсемпе ĕҫлекен  Ивао Охаси тата Чăваш Ен Пуҫлăхĕ Михаил Игнатьев регионти инвестици илĕртӳлĕхĕ пирки сăмахланă, ҫĕнĕрен те ҫĕнĕ предприятисем уҫассипе ҫыхăннă ыйтусем тавра канашланă.  

Республика Пуçлăхĕпе пĕрле куравпа РФ Патшалăх Думин депутачĕ Николай Малов, Чăваш Республикин Министрсен Кабинечĕн Председателĕн ҫумĕ - республика Пуçлăхĕн Администрацийĕн Ертӳçи Юрий Васильев, Министрсен Кабинечĕн Председателĕн заместителĕ - ял хуçалăх министрĕ Сергей Артамонов, ĕçлев тата социаллă хӳтлĕх министрĕ Сергей Димитриев, экономика аталанăвĕн, промышленноç тата суту-илӳ министрĕн тивĕçĕсене вăхăтлăх пурнăçлакан Светлана Ананьева, Шупашкар хулин администрацийĕн пуçлăхĕ Алексей Ладыков паллашнă.

Курав çĕртме уйăхĕн 24-мĕшĕнче юлашки кун ĕçлет. Кирек кам та пырса унпа паллашма пултарать, шатера тӳлевсĕр кĕртеççĕ. Мероприятийĕн йĕркелӳҫисем Чăваш Республикин Экономика министерстви тата «Инновационный электротехнический кластер Чувашской Республики» Ассоциацийĕ шутланать.  

Фоторепортаж