Чăваш Республикин Пуçлăхĕ Михаил Игнатьев Пӗтӗм тӗнчери коопераци кунӗ ячӗпе саламлани
Потребительсен кооперацийӗн хисеплĕ ӗҫченӗсемпе ветеранĕсем тата пайҫисем!
Професси уявӗпе – Пӗтӗм тӗнчери коопераци кунӗ ячӗпе чун-чӗререн саламланине йышӑнсамӑр!
Чӑваш Ен потребительсен кооперацийӗ ҫӗршыври коопераци юхӑмӗпе тачӑ ҫыхӑннӑ. Нумай енлӗ ӗҫ-хӗле малалла аталантарса пынине, ӗмӗрхи йӑла-йӗркене тивӗҫлипе сыхласа упранине, инновацисене ӑнӑҫлӑн ӗҫе кӗртнине пула эсир Раҫҫей Центросоюзӗн тытӑмӗнче малти ретре тӑратӑр. 2018 ҫулхи ӗҫ-хӗлшӗн Чӑвашпотребсоюз регионти потребитель обществисен союзӗсен хушшинче хӑйӗн малти вырӑнне сыхласа хӑварчӗ – Пӗтӗм Раҫҫейри «Ӗҫ-хӗл отраслӗсене тухӑҫлӑ аталантарнӑшӑн» ӑмӑртура пӗрремӗш вырӑна тивӗҫрӗ.
Юлашки ҫулсенче Чӑвашпотребсоюз организацийӗсем цифра экономикине хастарлӑн аталантараҫҫӗ, пурлӑхпа техника никӗсне ҫирӗплетес ӗҫе инвестицисем хываҫҫӗ, ҫакӑ вӗсем ял территорийӗсен аталанӑвне хывакан тӳпе шайне палӑрмаллах ӳстерет. Коллективлӑ хуҫалӑхсемпе, килти хушма хуҫалӑхсемпе ҫыхӑнса ӗҫлессине анлӑлатса эсир тӗп тӗллеве – ялта пурӑнакансене паха таварсемпе тата лайӑх шайри пулӑшу ӗҫӗсемпе тивӗҫтерессине – пурнӑҫлас тесе тата та тачӑрах пӗрлешсе вӑй хуратӑр.
Сире тӑрӑшуллӑ ӗҫӗршӗн, социаллӑ яваплӑха туллин туйса тӑнӑшӑн пӗтӗм чунтан тав тӑватӑп, ҫирӗп сывлӑх, ырлӑхпа тӑнӑҫлӑх тата мӗнпур лайӑххине сунатӑп!
Чӑваш Республикин Пуҫлӑхӗ Михаил Игнатьев
