Çĕнĕ професси — тӳлевсĕр
Чăваш Енре пурăнакансем çĕнĕ цифра профессине тӳлевсĕр вĕренме пултарĕç.
Юпа уйăхĕн 15-мĕшĕнчен пуçласа уйрăм цифра сертификачĕсем илме ыйту йышăнĕç. Çак документпа çĕршывра малта пыракан аслă шкулсене вĕренме кĕме пулĕ. Кăçал Раççейĕпе 33 пине яхăн цифра сертификачĕ пама палăртнă. Чăваш Ен — çак проекта хутшăнакан 39 регион йышĕнче.
Ку документа илме 18 çултан аслăрах, пенси çулне çитмен, аслă е вăтам професси пĕлĕвĕ илнĕ, ĕçлеме пултаракан Раççей гражданинĕсен шанăç пур. Сертификат цифра экономикин 22 юхăмĕнчен пĕринпе патшалăх укçипе вĕренме май парать. Çакăн валли цифровойсертификат.рф сайтра регистрациленмелле.
