Паян, юпа уйăхĕн 29-мӗшӗнче, Чӑваш Ен Пуҫлӑхӗ ҫумӗнчи Общество канашӗн пӗрремӗш ларӑвӗ иртнĕ. Ӑна уҫнӑ май регион Ертӳҫи Общество канашӗн тӗп тӗллевӗ – регионăн социаллӑ пурнӑҫĕпе экономикине аталантарас тĕлĕшпе паха сĕнӳсемпе пулăшасси, общество пайĕнче тăрăшакансемпе килĕшсе пĕр-пĕринпе тухăҫлĕ ĕҫлессине каланă. Тĕрлĕ сĕнӳсем хатĕрлес ĕҫ те кун йĕркинче тăмаллине асăннă вăл сăмаха малалла тăснă май.

"Обществӑлла канаш Чӑваш Республикин Пуҫлӑхӗ валли тĕрлĕ сĕнӳсем парса витĕм кӳрĕ, усăллă канашсем хатĕрлĕ. Советниксен институтне ҫапла майпа вара тĕпрен ҫĕнетсе улăштарăпăр", - тенӗ Олег Николаев.

Аса илтеретпӗр, Чӑваш Ен Пуҫлӑхӗ ҫумӗнчи Обществӑлла канаш туса хурасси ҫинчен калакан указа Олег Николаев  юпа уйăхĕн 16-мӗшӗнче алӑ пуснӑ. Канаш пайташĕсем общество пӗрлешӗвӗсен представителӗсем тата  та ытти хастар та пысăк тавра курăмлă ертӳҫĕсем.

Чăваш Ен Пуҫлăхĕ ҫумĕнчи Общество канашӗн председателӗ  пулма Наталия Партасовăна шаннă. "Обществӑлла канашра халӗ 25 пайташ шутланать. Ку вӑл пысӑк канашлу органне йӗркелемелли пуҫламӑшӗ кӑна. Пирӗн  тĕллевсенчен пĕри - влаҫпа общество хушшинчи ҫыхăнăва сарасси. Ҫавна тӑвас тесен пирӗн пурин те пӗрле ӗҫлемелле", - тесе палӑртнӑ вӑл.

Общество канашӗн пӗрремӗш ларӑвӗнче унăн пайташĕсем тĕрлĕ комисси ĕҫĕсене пăхса тухнă, сăмах май вĕсен председателĕсене те палăртса хăварнă.

Ҫавӑн пекех Чӑваш Республикин Конституцине йышӑннӑранпа 20 ҫул ҫитнине уявлассипе ҫыхăннă мероприятисем пирки те калаҫнă,  "вӑрҫӑ ачисене" хушма социаллӑ пулӑшу памалли мерӑсене пăхса тухнă.

Фоторепортаж