«Культура ҫурчĕсем нумай функциллĕ пулмалла», - тесе палăртнă Чăваш Ен Пуҫлăхĕ Олег Николаев
Канаш районĕнчи Хучелте çĕнĕ клуб уçăлнă. Ăна "Культура" наци проекчĕн Чăваш Республикин "Культура хутлăхĕ" регион проекчĕпе килĕшӳллĕн туса лартнă.
Раштав уйăхĕн 26-мӗшӗнче Чӑваш Ен Пуҫлӑхӗ Олег Николаев Канаш районӗнчи Хучелти Культура ҫуртӗнче "Ял культурине аталантарасси - патшалăх политикин тĕп тĕллевĕсенчен пĕри" темӑпа "çавра сĕтел" мелĕпе уҫă калаҫу ирттернĕ. Чӑваш Республикин культура министрӗ Светлана Каликова "Культура" наци проекчӗн шайӗнче 2020 ҫулта 1 клуба тӗпрен юсани, 3 ҫӗнӗ клуб туса лартни ҫинчен хыпарланă. 19 ял клубне юсанӑ, вĕсенчен 17-шне "Вырӑнти культура ҫурчӗ" программӑпа килĕшӳллĕн модернизациленӗ. "Культура" нацпроект укҫи-тенки шучӗпе хальхи пурнăҫпа килĕшсе тăракан 4 вулавăша ҫӗнетнӗ. Чăваш Республикин культура министрĕ Светлана Каликова Чăваш Ен ялĕн культура аталанăвĕнчи кăçалхи тата çитес çулхи тĕллевĕсемпе паллаштарнă.
2021 ҫулта республикӑри культура центрӗсене юсас ĕҫ малалла пырать. Муркаш районӗнчи культура ҫурчӗсене тума тата Патӑрьел, Тӑвай районӗсенче икӗ ял культура ҫурчӗсене тӗпрен юсама укҫа-тенкӗ уйӑрнӑ.
Тепӗр ҫулхине модернизациленӗ библиотекӑсен йышне Шупашкар районӗнчи Атлаш ял библиотеки тата Йӗпреҫ районӗнчи тӗп библиотека кĕмелле. Иккӗшӗ те - модель библиотекисен конкурсӗн ҫӗнтерӳҫисем.
Олег Николаев ял клубӗсем тума малашлӑхра пĕрешкел проектсемпе усӑ курмаллине палӑртнă. "Ял клубӗсем нумай функциллӗ пулмалла", - хушса каланă вӑл.
Ялта культура учрежденийӗсем туса лартнисӗр пуҫне вӗсенче тата лайăх ӗҫлемелле. Паян вĕсене ăста кадрсемпе тивĕҫтересси ҫивӗч ыйту пулса тăрать. Ку ыйту тахҫанах тухса тăнă тесен те йăнăш мар пулĕ.
