Укҫа-тенкĕне республика бюджетне ҫитес вăхăтра тӳрлетӳ кĕртнĕ вăхăтра кĕртсе хăварăпăр. Кун пек йышăну ҫинчен Чӑваш Ен Пуҫлӑхӗн тивĕҫĕсене вăхăтлăха пурнăҫлакан Олег Николаев шкулчченхи вӗренӳ учрежденийӗсен ертӳҫисемпе ирттернĕ тӗлпулура пĕлтернĕ. Мероприяти Шупашкарти 210 № -лĕ "Лучик" ача садӗнче иртнĕ.

Диалог форматӗнче пулнă тӗлпулура етӳҫĕсем шкулчченхи вӗренӳ тытӑмне аталантармалли чи ҫивӗч ыйтусем пирки сӳтсе явнӑ.

Шупашкарти 206 № - лӗ ача садӗн ертӳҫи Елена Кадирова Альгешри микрорайонта ача сачӗ тума май пуррипе ҫукки ҫинчен ыйтса пĕлнĕ,  вӑл каланӑ тӑрӑх, черетре 500-е яхӑн ача тӑрать.

Олег Николаев кӑҫал республикӑра 9 ача сачӗ, ҫав шутра Альгешра та тума пуҫланине аса илтернĕ. Ҫакнашкал ҫĕнĕлĕх республика бюджетне кӗртме палӑртнӑ тӳрлетӳсем юлашки хут  пӑхса тухнӑ чухне уҫӑлнине асăннă вăл.

Ҫӗнӗ Шупашкар тата районӗсенче ĕҫлекен ача сачӗсен заведующийӗсем учрежденисене тӗпрен юсас ыйту пирки сăмах пуҫарнă.

"Нумаях пулмасть ҫак ыйтăва эпӗ министрсемпе сӳтсе яврӑм. Йывӑрлӑхсем патне комплекслӑ пымалла. Пӗр ҫул ача садӗнче алӑксене улӑштарни, тепӗр ҫулхине тин стенасене сӑрлани тӗрӗс мар. Эпир бюджетран укҫа куҫарма майсем тупрӑмӑр шкулчченхи вӗренӳ учрежденийӗсене юсаса ҫĕнетме укҫа-тенкӗ ярса парӑпӑр. Малашне улшӑнусем кӗртессине шута илсе сӑмах 500 миллион ытла тенкӗ ҫинчен пырать. Заведующисем тӗрӗс темӑна ҫӗклерӗҫ. Ачасен хӑрушсӑрлӑхӗ ҫинчен сӑмах пырать, тепĕр тесен вĕсене кирлĕ пек аталантарса пыма хăтлă условисем йĕркелесси те пирĕн пĕрлехи тивĕҫ", - тесе хуравланă Олег Николаев.

"Ача сачӗсене юсама ҫавӑн пек пысăк пулăшу укҫа-тенкӗ енчен юлашки 10 ҫулта пулман. Юлашки ҫулсенче Шупашкарта 30 учреждени уҫӑлнӑ.  Кирлĕ пек йышӑнӑва пула ача садне ҫӳрекен ачасем валли те тивӗҫлӗ условисем туса пама май уҫӑлчӗ. Хамран тата хула ҫыннисен ячĕпе сире ҫак пек йышӑну тунишĕн тав тӑватӑп", – тенĕ Шупашкар хула администрацийӗн пуҫлӑхӗ Алексей Ладыков.

Уҫă тĕлпулăва пӗтӗмлетнӗ май Чӑваш Республикин Пуҫлӑхӗн тивĕҫĕсене вăхăтлăха пурнăҫлака Олег Николаев педагогсене тарӑн шухӑшлӑ калаҫушӑн тав тунă.

Олег Николаев пуҫарнипе ҫӗнӗ объектсене уҫнӑ чухне, уҫă тĕлпулусем ирттересси  малалла та пулĕ.

Фоторепортаж