Чăваш Енре "Ҫамрӑк профессионалсем (WorldSkills Russia)" чемпионата савăнăҫлă лару-тăрура уҫнă
Нарăс уйăхĕн 25-мӗшӗнче И.Н. Ульянов ячĕллĕ Чăваш патшалăх университечĕн Культура керменĕнче "Ҫамрӑк профессионалсем (WorldSkills Russia)" чемпионата савăнăҫлă лару-тăрура уҫнă.
Кӑҫал чемпионатсен ӑмӑртӑвне Шупашкарти техникумсемпе колледжсен базинче, Ҫӗнӗ Шупашкар, Канаш тата Ҫӗрпӳри тăрăхĕнче йӗркелӗҫ.
Мероприятисене хутшăнма кăҫал Тутарстан, Мускав, Чулхула, Самара, Тула облаҫӗсен тата Санкт-Петербург хулисен представителӗсем кăмăл тунă. Ӑмӑртусене пӗтӗмпе 600 ытла ҫамрӑк профессионал 63 компетенципе хутшӑнать. Вӗсен ӗҫне Раҫҫейри тӗрлӗ хуласенчен 430-е яхӑн эксперт хак парӗҫ.
Чемпионата хутшӑнакансене Чӑваш Республикин Пуҫлӑхӗн тивĕҫĕсене вăхăтлăха пурнăҫлакан Олег Николаев саламланă.
"Ҫамрӑк профессионалсен юхӑмӗ" – хăйне евĕр чаплă пулăм. Кунта ăмăртусенче миҫемĕш вырӑн йышăнни ҫав тери пысăк пĕлтерĕшлĕ мар. Хӑвна кӑтартасси, ӑсталӑха ҫирĕплетсе пама пĕлесси ман шутпа, чи кирли пулмалла", – палӑртнă регион ертӳҫи. WorldSkills Russia вӑтам професси пӗлӗвӗн ҫӗнӗ стандартне тивӗҫтернине палӑртнӑ вӑл.
Кӑҫал пуҫласа WorldSkills Russia чемпионатра 50 ҫул аслӑрах ӑстасем тупӑшӗҫ. "Ӑсчахсен ăсталӑхĕ" проект шайӗнче 50 ҫултан иртнисем професси ӑсталӑхне пиллӗк компетенципе палӑртаҫҫӗ: "Сварка технологийӗсем", "Кирпӗч кладки", "Сантехника тата ӑшӑтасси", "Шкулчченхи воспитани" тата "Предпринимательство".
"Кирек-епле ҫулта та ăсталăха туптаса пыма, тавракурăмлăха ӳстерме юрать. Эпир час-часах ҫӗршыв Президенчӗ наставниксене аталантармалла тенине илтетпӗр. Ҫак ӗҫе хутшӑннипе ӑстасем шӑпах ӑрусен пӗр-пӗринпе ҫыхӑннине кӑтартаҫҫӗ. Ҫакӑ регионти экономикӑшӑн пӗлтерӗшлӗ ҫитӗнӳсем тума питӗ кирлӗ", - тенӗ Олег Николаев, тӗрлӗ ҫулсенчи представителсен хӑйсен ӗҫне пӗр-пӗринпе килӗштерсе тата професси тӗлӗшӗнчен ӑсталӑхпа туса пымаллине палӑртнă.
Регион ертӳҫи чемпионата хутшӑнакансене ӑнӑҫу суннă.
Чемпионата хутшăннисене ҫавӑн пекех Раҫҫей Федерацийӗн Патшалӑх Думин депутачӗсем Анатолий Аксаков тата Леонид Черкесов, "Ҫамрӑк профессионалсем (WorldSkills Russia)" проекта пурнӑҫлакан Департаментӑн ертӳҫи Марина Остроухова саламланă.
Регионти "Ҫамрӑк профессионалсем" (WorldSkills Russia) VIII уҫă чемпионатăн пӗтӗмлетӗвӗсене Чӑваш Республикинче нарăс уйăхĕн 29-мӗшӗнче палӑртӗҫ.
