Паян, пуш уйӑхӗн 10-мӗшӗнче, "Шупашкар-Арена" Пӑр керменӗнче Чӑваш автономи облаҫĕ йĕркеленнĕренпе 100 ҫул ҫитнине уявласа савăнăҫлă лару-тăру пулать.

Чăваш Ен Пуҫлăхĕн тивĕҫĕсене вăхăтлăх пурнăҫлакан Олег Николаев кашни эрнере ирттерекен планеркăра   Чăваш Республикин вице-премьерĕ Алла Салаева пӗлтернӗ тӑрӑх, театрализациленӗ спектакль ҫӗр ҫулхи  тапхăра ҫутатса парать имĕш.

Тĕрлĕ курав ĕҫĕсем йĕркеленĕ, архив хатĕрленĕ тенĕ вăл. Паллă пулăма 600-е яхӑн артист явӑҫтарнӑ. Уява Морис Яклашкин ертсе пынипе Чӑваш патшалӑх академи симфони капелӗн оркестрĕ илем кӳрĕ. Тӗп ĕҫсене пĕтĕмпех хатĕрленĕ, йĕркелӳ пайне 200 волонтер хутшӑнтарнă.

"Паян эпир республикӑри районсемпе хуласен парадне пӗрремӗш хут йӗркелетпӗр. Делегацисем пӗрлӗхе кӑтартаҫҫӗ, тӑван ҫӗршыв пӗрлӗхшӗн, Чӑваш Еншӗн мӑнаҫлӑн  утса иртĕҫ", –  тесе пĕлтернĕ Алла Салаева.

Мероприятие паян 4 пине яхӑн ҫын хутшӑнма кăмăл тунă.  Ветерансене, общество ĕҫĕнче тăрăшакансене, пысӑк предприятисен ертӳҫисене, врачсемпе педагогсене, культурӑпа спорт представителӗсене, строительсемпе финансистсене йыхравланӑ тенĕ вăл.

Уявра "Чăваш автономи облаҫне йĕркеленĕренпе 100 ҫул ҫитнине" палăртакан медальсене парасси пулӗ. Ăна Чӑваш Республикин Хисеплӗ гражданӗсем – Шупашкар тата Чăваш Ен митрополичĕ Владыка Варнава,  СССР халӑх артисчӗ Вера Кузьминична Кузьмина тата Шупашкар хулин Хисеплӗ гражданинӗ Иван Иванович Долгушин тивĕҫĕ.

Уяв 15:00 сехетре пуҫланать. Тӳрӗ эфирта мероприятине Чӑваш Ен Наци телекуравӗ кăтартать. Кăларăм тепӗр хут - 20 сехет те 30 минутра каҫхине пулать.