Пуш уйӑхӗн 24-мӗшӗнче Чӑваш Ен Пуҫлӑхӗн тивĕҫĕсене вăхăтлăх пурнăҫлакан Олег Николаев Чăваш Республикин Патшалăх Канашĕн депутачĕпе, «Раҫҫей лидерĕсем 2020» конкурса хутшăннă Григорий Даниловпа тĕл пулнă.

   Ертӳҫĕсем калаҫу вăхăтĕнче обществăлла проектсене пурнăҫла кĕртессине, депутатсен ĕҫӗ-хĕлне тата ытти ыйтăва сӳтсе явнă.  

Григорий Данилова  пĕтĕм Раҫҫейри конкурсăн суперфиналне тухнă ятпа Чӑваш Ен Пуҫлӑхӗн тивĕҫĕсене вăхăтлăх пурнăҫлакан ăшшăн саламланă.

   Аса илтеретпӗр, нарăс уйăхĕн пуҫламӑшӗнче федерацин Атӑлҫи округӗнче ҫурма финал пулса иртрӗ. Пӗтӗмлетӳсем тăрăх, Чӑваш Енрен финала Григорий Данилов, Александр Гатин, Иван Казамбаев, Илья Степанов тухнă. Суперфинала тухма хутшӑнакансен "Лидер чӗри"  темăна тĕпе хурса социаллӑ проект пурнӑҫламалла пулнӑ.

    Сӑмах май, Григорий Данилов "Депутат ассистенчӗ"  ятлă онлайн-сервис хатĕрлесе панă.  Ҫĕнĕ интернет-ресурс  граждансен ыйтăвĕсемпе ĕҫлеме пысăк пулăшу парать.

    Палӑртса хӑварар, "Сывлӑх сыхлавӗ" специализаци енӗпе «Раҫҫей лидерӗсем 2020» конкурс суперфиналистсен ячӗсене пӗлтернӗ. Ҫӗнтерӳҫӗсем 30 ҫын пулса тӑнӑ. Вӗсен шутӗнче - республикӑри клиника офальмологи больницин тӗп врачĕ Дмитрий Арсютов.

     Пӗтӗмпе суперфинала 300 ҫынна йыхравлĕҫ, ҫӗнтерӳҫӗсем 100 ҫын пулӗҫ.