Пуш уйăхĕн 27-мĕшĕнче Мускавра Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев  Раҫҫей Федерацийĕн Сывлăх сыхлавĕн Министрĕн ҫумĕпе Наталья Хоровапа ĕҫлĕ тĕлпулу ирттернĕ.  Тĕлпулу вăхăтĕнче ертӳҫĕсем регионта «Сывлăх сыхлавĕ» наци проектне пурнăҫа кĕртессипе ҫыхăннă ыйтусене сӳтсе явнă.   

   Чӗрепе юн тымарӗсен чирӗсемпе аптраса вилекенсен шутне чакарас тĕлĕшпе хушма мерӑсем йышӑнмалли пирки асăннă Олег Николаев.

    Чӑваш Ен Пуҫлӑхӗн тивĕҫĕсене вăхăтлăх пурнăҫлакан хăйĕн сăмахĕнче, хальхи вӑхӑтра республикӑри клиника больницин тӗп сиплев корпусĕн ҫумĕнче хушма центр ҫĕклесси пирки проекта хатĕрлес ĕҫ пынине каланă.  Асӑннӑ проекта пурнӑҫлани чирлӗ ҫынсене сиплев ҫурчĕсене вырнаҫтармалли уйӑрнӑ вӑхӑта кӗскетме май панине палăртнă.  Паллах ӗнтӗ, ҫакӑ чирлӗ ҫынсене вăхăтра пулăшупа тивĕҫтерессине витĕм кӳрет, ăнсăртран вилекенсен шутне чакарма пулăшать тенĕ вăл.

   Юн ҫаврӑнӑшӗн тытӑмӗн чирӗсенчен вилекенсен шутне чакарма нумай профильлĕ клиника больницине туса лартсан та лайăх пулнă пулĕччĕ.

    Олег Николаев каланӑ тӑрӑх, больница тытăмĕнче  хирурги уйрӑмĕ пулĕ, ҫавӑн пекех чирлисене тӳрех ятарлӑ бокса вырнаҫтарма, тухтӑрсем  туххăмрах кирлӗ  пек медицина тӗпчевĕсем ирттерме те пултарасси куҫкĕретех пулĕ.

Ҫак ыйтӑва ҫывӑх вӑхӑтра татса парӗҫ.

   Наталья Хорова сывлӑх сыхлавне аталантарма республикӑри влаҫсем вӑй хунине пысӑка хурса хакланă, асӑннӑ тытăм ҫине регионта кирлӗ пек тимлӗх уйăрнине каланă.

   Тĕлпулу вăхăтĕнче ертӳҫĕсем ял тăрăхĕсенче, республикăн тĕп хулинче поликлиникăсем хута ямалли пирки сăмахланă.  Сăмах май, Олег Николаев коронавирус енĕпе лару-тăру регионта епле пулнипе паллаштарнă.