Чăваш Енре 2020 ҫулта  футбол вылямалли 11 уй хута яма плана кĕртнĕ.  Ҫакăн пек кĕске вăхăт хушшинче Чăваш Енре пуҫласа пысăк ĕҫсем пурнăҫланаҫҫĕ.

Ака уйăхĕн 16-мĕшĕнче Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев видеоҫыхăну мелĕпе канашлу ирттернĕ.  Ҫӳлерех асăннă ыйтăва регионти муниципалитетсен ертӳҫисемпе тĕплĕн пăхса тухнă.  Контрактсене алă пусассине, проектсене тĕплĕ хатĕрлессине, строительство енĕпе ҫыхăннă мĕнпур ыйтăва тарăн тишкернĕ.

Кăҫалхи ҫул валли республика хыснинче объектсен строительство ĕҫне пурнăҫлама пурĕ 356 млн уйăрса хăварнă.  Ҫĕнĕ объектсене республикăри 9 муниципалитетра хута ярĕҫ.  Куславккара, Каҫал енре, Красноармейскинче, Хĕрлĕ Чутайра, Муркашра, Вăрмарта, Шупашкар районĕнче, Етĕрнере, Елчĕкре паха лапамсем халăха савăнтарасси пĕрре те иккĕлентермест.  Шупашкар хулинче вара харăсах икĕ уй хута яма тĕллев лартнă, "Энергия" тата "Олимпийский" стадионсем реконструкциленеҫҫĕ.   

Проектсем хальĕхе пурин те хатĕр мар-ха. Экспертиза урлă пурĕ те икĕ муниципалитет тухнă, вĕсем: Ельчĕксем тата Етĕрнесем.  Кунсăр пуҫне Шупашкар хулинчи пĕр объектăн проекчĕ хатĕр.  Каҫалсем, Хĕрлĕ Чутайсем проект ĕҫĕсене хатĕрлесе пĕтернĕ пекех тесен те йăнăш мар.

Олег Николаев хăйĕн сăмахĕнче мĕнпур палăртса хунă объектсене графикпа килĕшӳллĕн пурнăҫа кĕртсе пымаллине чĕнсе каланă.  Конкурс ĕҫĕсене те тĕплĕ ирттермеллине асăрхаттарса хăварнă, футбол уйӗсене тума (юсаса ҫӗнетме) суйласа илмелли конкурс процедурисене ҫĕртме уйăхĕн 15-мĕшĕччен вĕҫлесен аван тенĕ сăмаха малалла тăснă май.  

Палăртмалла, Олег Николаев мĕн ачаран фубтол выляма юратать.  Енчен те спорт енĕпе инфратытăма лайăхлатса пырсан, халăх тата та ытларах хăйсен сывлăхне ҫирĕплетме пуҫлĕ тенĕ вăл.  Спорт пирĕн пурнăҫăн тĕп пайĕ. Апла пулсан, ыйтăва куҫран вĕҫертме юрамасть. Сывă ҫын, ĕҫре те хастар, унăн тухăҫлăхĕ те пысăк.   Пирĕн "Демографи" наци проекчӗн "Спорт – пурнӑҫ норми" федераци палăртакан проектсене пурнăҫа кĕртмелле, халăхăн пурнăҫ условийĕн шайне лайăхлатса пырассишĕн ырми-канми тăрăшмалла.

«Футбол вăййисене халăх питĕ кăмăллать.  Кирек епле ҫулти те спортăн ҫак тĕсне хапăл туни пĕрре те вăрттăнлăх мар.  Ҫак ăмăртусем пĕр-пĕринпе килĕшсе ĕҫлеме вĕрентеҫҫĕ. Ушкăна туйса пыни, йывăрлăхсене те парăнтарма  витĕм кӳрет», - тесе каланă регион Пуҫлăхĕн тивĕҫĕсене вăхăтлăх пурнăҫлакан.

Пĕлме: 2017 ҫулта Олег Николаев Раҫҫей Федерацийĕн Патшалăх Думин командинче футболла выляссипе ушкăнра чи хастар вăйăҫ пулнă, ăмăртусенче тапăнакансене парăнтарма пĕлнĕ, хисеплĕ ята тивĕҫнĕ.  Кун пирки  Чăваш Республикин Пуҫлăхĕн тивĕҫĕсене вăхăтлăх пурнăҫлакан «Инстаграм» социаллӑ сетьре каласа панă.