Ака уйăхĕн 16-мĕшĕнче Чăваш Республикин Патшалăх Канашĕн черетлĕ сессийĕ иртнĕ.  Унта депутатсем Чăваш Республикин Пуҫлăхĕн тивĕҫĕсене вăхăтлăх пунăҫлакан Олег Николаев пуҫарăвĕпе килĕшӳллĕн туса хатӗрленӗ социаллă пĕлтерĕшлĕ саккун проекчĕсене пăхса тухса йышăнса хăварнă. 

Кăҫал Тăван ҫĕршывăн Аслă вăрҫинче Ҫĕнтерӳ тунăранпа 75 ҫул ҫитет, ҫавна тĕпе хурса, Чăваш Республикин территорийĕнче пурăнакан ветерансене, уйрăм категорири граждансене пĕр хутчен пулăшу памалли ҫинчен калакан ĕҫ хутне тишкернĕ, республика бюджетĕнчен укҫа-тенкĕ уйăрса пама йышăннă.   Пĕр хутчен памалли укҫан виҫи 25 пин тенкĕпе танлашать.  Паллă, ӑна вăрҫă инваличĕсем, Тăван ҫĕршывăн вăрҫинче паттăрăн ҫапăҫса сусăрланнă ватăсем тивĕҫеҫҫĕ.  Ҫавăн пекех ачасене социаллă пулăшу парасси ҫинчен калакан Чăваш Республикин  саккунĕн 6-мĕш статйине те улшăнусем кĕртнĕ.  Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев пуҫарăвĕпе Чăваш Республикинчи ачасем пирки калакан ĕҫ хутне ҫирĕплетнĕ. 

Енчен те ачасене усрава илнĕ пулсан, ҫемьери ашшĕ-амăшне, опекуна патшалăх енчен пулăшу пулĕ.  Енчен те иккĕ е тата виҫĕ ачана воспитани пама пулăшу кӳреҫҫĕ пулсан, 3604 тенкĕ уйăрĕҫ, енчен те вара виҫĕ е тата ытларах пулсан 5119 тенкĕ пулĕ.  Усрава ултă ача илнĕ пулсан, опекуна 5119 тенкĕ куҫарса парĕҫ.  Маларах ҫак пулăшусем пулнă, анчах та вĕсен виҫи ҫав тери пĕчĕк тенĕ ҫынсем.  

Аса илтеретпĕр, нумаях пулмасть Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев халăха харпăр хăй ыйтăвĕсемпе йышăннăччĕ. Ун чухне шăпах та, ашшĕ-амăшĕсем нумай ачаллисене, енчен е ҫемьере пилĕк ача пулсан, патшалăх енчен кăштах та пулин пулăшу пулмĕ-ши тесе ыйтнăччĕ. «Паллă, нумай ачаллă тесе виҫĕ ача пулсан та калама юрать, анчах та вĕсем пирки сăмах пымасть. Енчен те вара ҫемьере пилĕк ача е тата та ытларах пулсан, вĕсене кăштах урăхларах майпа пулӑшса пулмасть-ши теҫҫĕ вĕсем.  Шăпах та, ҫакна лайăх ăнланмалла. Пилĕк ача пăхса ҫитĕнтерсе ура ҫине тăратма тата та йывăртарах», - тесе каланă шухăша пӗтӗмлетсе Чăваш Ен Пуҫлăхĕн тивĕҫĕсене вăхăтлăх пурнăҫлакан Олег Николаев ун чухнехи йышăну кунĕнче. 

Чăваш Республикин Патшалăх Канашĕн сессийĕнче тепĕр ыйту пирки те чарăнса тăнă, короновирус теми кун йĕркинче ҫивĕч тăрать.  Апла пулсан, сессине видеоҫыхăну мелĕпе ирттерме сĕнӳ тăратнă депутатсем. Кун пек йышăну туни, халăха хăрушсăрлăхпа тимвĕҫтерме май парать тесе сăмаха малалла тăснă вĕсем.

Кун йĕркине кĕртнĕ 18 ыйтăва Чăваш Республикин Патшалăх Канашĕн депутачĕсем тĕплĕн пăхса тухса тивӗҫлӗ йышӑнусем тунă. 

Пĕлме: Вăтăр тăххăрмĕш сессире нумайăшĕ тахçантанпах кĕтекен саккунăн — «Вăрçă ачисем çинчен» — проектне пăхса тухнă. Аса илтеретпĕр: Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев РФ Патшалăх Думин депутачĕ пулнă вăхăтрах «вăрçă ачисен» статусне палăртасшăн пулнă. Олег Алексеевич хăйĕнчен асăннă статуса çирĕплетме ыйтакан нумай пулни пирки ЧР Патшалăх Канашĕн депутачĕсемпе йĕркеленĕ тĕлпулура та, унтан тунтикунсерен иртекен канашлура та пĕлтернĕччĕ,  çынсен ĕмĕчĕ пурнăçланать: депутатсем Чăваш Республикин «Вăрçă ачисем çинчен» саккунне йышăнас тесе сасăланă.