Документсене вăхăтра хатĕрлемелле
Паян Правительство çуртĕнче районсемпе хуласенче футбол уйĕсем тăвас тĕлĕшпе канашлу иртрĕ. Ăна Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев ертсе пычĕ. Унта райадминистраци пуçлăхĕсем хутшăнчĕç.
Республикăна адреслă инвестици программипе килĕшÿллĕн кăçал 9 районта тата Шупашкарта футбол уйĕсем тумалла. Çак ĕçе тумашкăн бюджетра 356 миллион тенкĕ ытла уйăрнă. ЧР спорт министрĕн тивĕçĕсене пурнăçлакан Василий Петров пĕлтернĕ тăрăх, хальхи вăхăтра Елчĕкпе Етĕрне администрацийĕсем тата республикăри футбол шкулĕ тăратнă проектсем патшалăх экспертизи витĕр ăнăçлă тухнă. Ыттисем документсене хатĕрлесе пĕтереймен-ха. Хутсене ЧР строительство министерстви тĕрĕслет.
Александр Героев каланă тăрăх, Комсомольскисемпе Хĕрлĕ Чутайсем те документсене тăратнă, анчах çитменлĕхсем пуррипе каялла тавăрса панă. Шупашкарти «Энергия» стадионăн та тÿрлетмеллисем пур. Тивĕçлĕ хутсене вăхăтра туса çу уйăхĕн 15-мĕшĕччен экспертиза витĕр тухмаллине, çĕртме уйăхĕн 15-мĕшĕччен аукцион докуменчĕсем хатĕр пулмаллине палăртрĕ Олег Алексеевич. «Ку ĕçре должноçри çынсен яваплăхĕ питĕ пысăк. Вĕсем хăйсен тивĕçне тÿрĕ кăмăлпа пурнăçласан пĕтĕмпех вăхăтра ĕлкĕрмелле. Кунта вырăнти хăй тытăмлăх тата патшалăх органĕсем пĕр-пĕринпе килĕштерсе ĕçлени те пĕлтерĕшлĕ», — терĕ регион ертÿçи канашлăва пĕтĕмлетсе.
