Ака уйăхĕн 16-мĕшĕнче Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев  информаци ресурсĕсен пĕрлехи центрне уҫнă ҫĕре хутшăннă. Ку центрта наци проекчĕсене регионта мӗнлерех пурнӑҫласа пыни ҫинчен пӗлтерсе тӑракан хыпарсене туллин вырнаҫтарса пырĕҫ. Асăннă Портала Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев пуҫарнипе хута янă. Чăваш Республикин Информаци политикин минтистерстви хушăва вăраха тăсмасăрах пурнăҫа та кĕртнĕ.

«Наци проекчĕсене пурнӑҫласа пынине Раҫҫей Федерацийĕн Президенчĕ Владимир Владимирович Путин хăй ҫирĕп тĕрĕслеве илнĕ.  Наци проекчĕсене пурнăҫлама федераци центрĕнчен сахал мар укҫа-тенкĕ тăкакланать.  Раҫҫей Федерацийĕн федераци хыснинчен планпа килĕшӳллĕн, мĕнпур укҫа вăхăтра тата туллин куҫса пырать.  Халăхăн пурнăҫ условийĕн шайĕ кулленех лайăхланса ырă еннелле куҫса пыни те никамшăн та вăрттăнлăх мар.  Регионта пурнăҫланакан ĕҫсем пирки ҫынсене вăхăтра тата туллин пĕлтерсе тӑни паха. Халăх объектсене курать, вĕсемшĕн хавхаланса пурăнать.  Шăпах та, ҫак Портала ҫак тĕллевпе пурнăҫа кĕртнĕ те», - тесе каланă Чăваш Республикин Пуҫлăхĕн тивĕҫĕсене вăхăтлăха пурнăҫлакан Олег Николаев.

Чăваш Республикин информаци политикин министрĕ Михаил Анисимов хăйĕн сăмахĕнче http://np.cap.ru  Портала  хута яма «Чӑваш Республикин ИТ-Кластерӗ» информаци технологийĕсен Ассоциацийĕ сахал мар пулăшнине хыпарланă. 

«Кĕске вăхăт хушшинче пĕрремĕш онлайн-хакатон ĕҫлеттерсе янă.  Унта Раҫҫейри 25 ушкăн, ҫав шутра Шупашкартан, Оренбургран, Тюменьрен сахал мар специалист хутшăннă.  Кашни ушкăн хăйне евĕр ĕҫленĕ, вĕсем ҫирĕп йĕрке пултăр тесе тăрăшнă.  Наци проекчĕпе ҫыхăннă хыпарсене тухăҫлă хатĕрлесе тăратасси пирки тĕплĕ шухăшланă», - тесе пĕлтернĕ Михаил Анисимов.

Портал пĕтĕмпе тăватă пайран тăрать, вĕсенче пĕтĕмпех наци проекчĕпе ҫыхăннă анлă хыпарсене вырнаҫтарнă.  Нормативлӑ никӗс докуменчĕсем те ҫав блоксенче чылай.  Пĕр сăмахпа каласан, халăх валли ҫителĕклĕ таран хыпар вырнаҫтарнă.  Палăртма кăмăллă, видео, фотоматериалсем те куҫ умĕнчех пулĕҫ.

Порталăн ĕҫĕпе республикăри ĕҫ тăвакан влаҫ органĕсенче тăрăшакансем кулленех усă кураҫҫĕ. Министерство ертӳҫисем те ҫĕнĕ ресурса хапăл туни куҫкĕретех.

«Интерактивлă карттăра объектсем пирки хыпарсем пур. Вĕсем хăҫан тата ăҫта хута каясси те пĕтĕмпех паллă.  Халăха вуласа пĕлме питĕ ансат.  Регионти проектсем кунта хăйсен вырăнне тупнă. Хыпарсем пĕтĕмпех паянхи пурнăҫ таппипе тӳр килсе тăраҫҫĕ», - тесе каланă хăйĕн сăмахне Чăваш Республикин вĕренӳ тата ҫамрăксен политикин министрĕ Сергей Яковлев. 

«Хăй вăхăтĕнче наци проекчĕсене тĕрĕслесе пынă вăхăтра, эпĕ ертӳҫĕ пулнăччĕ. Тулли информацисене пĕр ресурса вырнаҫтарса пыни халăхшăн та ертӳҫĕсемшĕн те питĕ вырăнлă тесе палăртнăччĕ. Кашни регионта наци проекчĕсемпе епле ĕҫлесе пынине вăл центрта вуласа пĕлме меллĕ. Пĕр-пĕрин паха ĕҫ опытне те курма пулать», - тенĕ Олег Николаев.