Коронавирус тесе мӗнпур МИХ ирӗн-каҫӑн янӑранӑ саманара ҫынсене пӗртте ҫӑмӑл мар. Чиртен хӑранипе сиксе чӗтрекенсем кашни ҫынра тенӗ пек хӑрушлӑх кураҫҫӗ, чикӗ леш енче пулнисенчен уйрӑмах шикленеҫҫӗ вӗсем. Хӑш-пӗр специалист шухӑшланӑ тӑрӑх, ҫак саманара ҫынсене психологсен пулӑшӑвӗ кирлӗ. Чӑн та, тӳлевсӗр пулӑшакан психологсем те, юристсем те тупӑнаҫҫӗ. Вӗсем «хӗрӳ линисем» уҫаҫҫӗ.

Чӑваш Енре ҫӗнӗ коронавирус инфекцине сарас мар енӗпе ӗҫлекен оперативлӑ штабӑн ӗҫлӗ ушкӑнӗ ҫынсен ыйтӑвне  паян «тӳрӗ лини» вӑхӑтӗнче уҫӑмлатӗ. Унта чир-чӗрпе ҫыхӑннӑ ыйтӑва, карантина пӑсакан йӗркелӗхе пӑсакансене епле яваплӑх кӗтнине тата ытти саманта уҫӑмлатма шантараҫҫӗ.

Ыйтусене (8352) 26-00-36 номерпе паян 14 сехетрен 15 сехетчен йышӑнӗҫ.

«Тӳрӗ линие» Чӑваш Ен Наци телекуравӗ кӑтартӗ, Наци радиовӗ тата «Тӑван радио» эфирӗсенче те итлеме май килӗ. YouTube видеохостингра та «тӳрӗ линие» курма май килӗ.