Пысăк уявра – Мăнкунра пур ҫĕрте те йĕрке хуҫаланнăшăн республика Пуҫлăхĕн тивĕҫĕсене вăхăтлăх пурнăҫлакан Олег Николаев ырласа тав сăмахĕсем каланă
Ака уйăхĕн 20-мĕшĕнче Чăваш Республикин Министрсен Кабинечĕн членĕсемпе, федераци службисен регионти уйрăмĕсен ертӳҫисемпе кашни эрнере пулакан ĕҫлĕ планеркăна республика Пуҫлăхĕн тивĕҫĕсене вăхăтлăх пурнăҫлакан Олег Николаев ирттернĕ. Мăнкун уявне регионта епле йĕркеленине ертӳҫĕсем кĕсен пăхса тухнă.
Республикăри чиркӳсенче пурĕ 3700 ҫын служба тивĕҫне пурнăҫланă. Ытти ҫулсенче ҫак кăтарту 29 пинпе танлашнă.
«Чиркӳсенче Мăнкун уявне халалланă кĕлĕсем хупă режимра иртччĕр тесе ятарлă ĕҫ хучĕсене алă пусса ҫирĕплетнĕ. Халăх саккун йĕркине пăсман, куншăн вĕсене пысăк тав. Шупашкар тата Чăваш Ен митрополичĕ Варнава кăҫалхи мероприятине ҫапла ирттерме ирĕк йышăннăшăн тав сăмахĕсем калатăп», - тенĕ хăйĕн сăмахĕнче Олег Николаев.
Кунсăр пуҫне право хуралĕсенче тăрăшакансем хăйсене шанса панă ĕҫе тӳрĕ кăмăлпа яваплăха туйса пурнăҫлани те куҫкĕретех. Пысăк уявра – Мăнкунра пур ҫĕрте те йĕрке хуҫаланнă тенĕ вăл сăмаха хушса.
Коронавирус амакĕ пур-пĕрех регионта лăпланман-ха. Ыйтăва куҫран вĕҫертме юраманнине асăрхаттарнă тепĕр хут республика Пуҫлăхĕн тивĕҫĕсене вăхăтлăх пурнăҫлакан.
«Кунне 30 ҫын вăтамран республикăра чирлет. Медицина пайĕнче тăрăшакансем, халăхăн сывлăхне упраса хăварассишĕн ырми-канми тăрăшаҫҫĕ. Пирĕн тимлĕхе самантлăха та ҫухатма юрамасть, асăрхануллă пулма ыйтатăп», - тесе чĕнсе каланă Олег Николаев.
Чӑваш Енре те электронлӑ пропусксем пулӗҫ. Ака уйӑхӗн 21-мӗшӗнчен пуҫласа муниципалитетсен хушшинче ҫӳрекен маршрутсем электронлӑ пропуск илӗҫ.
Аса илтерер: коронавируса пула Чӑваш Енре районсене ҫӳрекен маршрутсен йышне чакарнӑ. Анчах ку самантпа усӑ куракансем тупӑннӑ: саккуна пӑсса пассжирсене турттаракансем пуррине тупса палӑртнӑ.
Ҫавна май муниципалитетсен хушшинче ҫӳрекен маршрутсене электронлӑ пропуск пама йышӑннӑ. Хушӑва Чăваш Республикин Пуҫлăхĕн тивӗҫӗсене вӑхӑтлӑх пурнӑҫлакан Олег Николаев алӑ пуснӑ.
Пропуск илес тесен, ҫак адреса propusk.cap.ru кĕрсе регистрациленмелле. Документпа ака уйăхĕн 30-мĕшĕччен усă курма юрать.
«Саккунсене пурин те ҫирĕп пăхăнмалла, йĕрке пăсакансене явап тыттарĕҫ. Асăннă режим хальлĕхе ака уйăхĕн 30-мĕшĕччен пулать», - тенĕ сăмаха ҫавăрса Олег Николаев.
