Ака уйăхĕн 20-мĕшĕнче Чăваш Республикин Министрсен Кабинечĕн черетсĕр ларăвĕ иртнĕ. Регионта коронавируса хирĕҫ кĕрешес мероприятисене йĕркелесе пыма республика хыснинчен районсемпе хуласене Чăваш Республикин Резерв фондĕнчен укҫан пулăшу парасси пирки ĕҫ хутне пăхса тухнă.  Проекта ырланă, йышăнса хăварнă ларăва пуҫтарăннисем.

Республикăри муниципалитетсене паянхи куна илес пулсан, 8 млн 361 пин тенкĕ куҫарса пама та ĕлкĕрнĕ.

«Пулăшу медицина хатĕрĕсене туянма тăкакланĕ.  Районсенче хĕрӳ ĕҫлеҫҫĕ, палăртнă мĕнпур мероприятисене йĕркеллĕ ирттерсе пыраҫҫĕ», - тесе хыпарланă Чăваш Республикин Министрсен Кабинечĕн Председателĕн ҫумĕ - финанс министрĕн тивĕҫĕсене пурнăҫлакан Михаил Ноздряков проект пирки ăнлантарса панă май.  

«Пысăк тĕреве республикăри муниципалитет пĕрлешĕвĕсене тĕллевлĕн куҫарса паратпăр. Ҫĕршывра усал амак алхаснине пула, мĕнпур районсемпе хуласенче мероприятисене ҫӳллĕ шайра ирттермелле, яваплăха ҫухатма юрамасть, усал чир сарăласран пурин те сыхă тăмалла, ҫирĕп мерăсене пăхăнмалла, медицина ĕҫченĕсем хушнине туллин пурнăҫламалла», - тесе сăмаха пĕтĕмлетсе каланă Чăваш Ен Пуҫлăхĕн тивĕҫĕсене вăхăтлăх пурнăҫлакан Олег Николаев.