Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев ҫĕршывра усал чир алхаснă тапхăрта, ҫав шутра республикăра та ҫирĕп йĕркесене пăхăнса предприятисемпе организацисем епле ĕҫлесе пынине тĕрĕслевре тытать.  Халăха хăрушсăрлăхпа тивĕҫтересси тĕп ыйтусенчен пĕри пулнине кулленех асăрхаттарать регионти мĕнпур предприятисемпе организацисен ертӳлĕхĕсене. Ака уйăхĕн 22-мĕшĕнче вăл   Г.А. Ильенко ячĕллĕ ЭЛАРА наукăпа производство комплексĕнче, Шупашкарти электроаппарад заводĕнче тата «Яхтинг» тулли мар яваплă обществăра пулнă, вĕсен ĕҫĕ-хĕлĕпе кĕскен паллашса тухнă.  

Асăннă предприятисенче халăха хăрушсăрлăхпа мĕнле тивĕҫтернине, коронавирус чирĕ ҫакланасран организацисенче тăрăшакансене епле хӳтĕлеме витĕм кӳнине те тишкернĕ регион ертӳлĕхĕ.  Паллă, ҫирĕп йĕркепе килĕшӳллĕн, ҫынсене предприятине кĕнĕ ҫĕрте ятарлă специалистсем тĕрĕслев витĕр кăлараҫҫĕ, хими препарачĕсемпе инфекцисене пĕтерме  тĕрлĕ шĕвексем йĕркелесе тăратнă.

«ЭЛАРА»  АО генеральнăй директорăн тивĕҫĕсене вăхăтлăх пурнăҫлакан Александр Бусарев хăйĕн сăмахĕнче предприяти ĕҫченĕсене усал амакран асăрханса ятарлă хатĕрсемпе туллин тивĕҫтернине хыпарланă.  Маскăсем, хӳтĕлев тумĕсем пурин те ҫителĕклĕ тесе сăмаха малалла тăснă вăл, ҫынсемпе кулленех профилактика ĕҫĕсене йĕркелесе пынине те асăнса хăварнă сăмах май. Пӳлĕмсенче хими препарачĕсемпе тасатсах тăнине, май килнĕ таран уҫăлтарнине палăртнă вăл.  Кун пек тĕслĕхе Шупашкарти электроаппарад заводĕнче те курма пулнă.

«ЧЭАЗ»  АО генеральнăй директорĕ Роман Никулин хăйĕн сăмахĕнче предприятире тăрăшакансем валли ĕҫ графикне ятарлă йышăнса хăварнине хыпарланă. Халăха пĕр ҫĕре пухса хăш-пĕр ыйтусене татса парас ĕҫе вăхăтлăха прахăҫланине, час-часах уйрăммăн ĕҫлĕ калаҫусем ирттернине палăртнă вăл. Видео-ҫыхăну мелĕ вăй илсе пыни куҫкĕретех предприятисенче.

«Яхтинг» ТМЯО ҫӳлерех асăннă предприятисенчи пекех ҫирĕп йĕркене пăхăнса ĕҫлеҫҫĕ.  Ĕҫе кĕнĕ ҫĕрте условисене пĕтĕмпех пăхăнса тăраҫҫĕ. «Яхтинг»  ТМЯО генеральнăй директорĕ Анатолий Шатиков хăйĕн сăмахĕнче, предприяти ĕҫченĕсем тасалăха пăхăнса пурăннине асăннă.  Профилактика ыйтăвĕ тĕп вырăнта пирĕн тенĕ вăл сăмаха ҫавăрса.

Ĕҫлĕ ҫул ҫӳреве пĕтĕмлетнĕ май, Олег Николаев предприяти ĕҫĕсемпе кăмăллă юлнă, коронавирус енĕпе йышăннă ҫирĕп мерăсене мĕнпур халăх пăхăннине курса ĕнентĕм тенĕ вăл. 

Пĕр тухнă пек чухне, регион Пуҫлăхĕн тивĕҫĕсене вăхăтлăх пурнăҫлакан производствăн ыйтăвĕсем пирки те чарăнса тăнă.  Йывăр лару-тăрура предприятисем епле ĕҫленине, вĕсене патшалăх енчен куҫакан тĕрлĕ пулăшусем пирки каласа панă.   Вырăнти ертӳҫĕсем хăйсене кăсăклантаракан ыйтусем ҫине хуравсем илнĕ.  

Журналистсен ыйтăвĕсем ҫине хурав панă май, Олег Николаев социаллă пĕлтерĕшлĕ предприятисене ҫĕршывра усал чир алхаснă вăхăтра  чăтма йывăр лекнине, экономика тăнăҫлăхне упраса хăварма та ансатрах тесе палăртнă. «Уйрăм промышленноҫ предприятисене ĕҫлеме условисем йĕркелесе панă. Вĕсенче халăха хăрушсăрлăхпа тивĕҫтерессипе профилактика мерисене те ҫирĕп пăхăнни куҫкĕретех. Курса ĕнентĕмĕр, чăнласах та предприяти ертӳҫисем хăйсене шанса панă ĕҫе яваплăха туйса, таса чунпа ĕҫлени паллă. Чăрмавсем те ҫук мар ĕнтĕ, усал амак вăхăтĕнче производствăн таварсен калăпăшĕ ытти ҫулхи ҫак тапхăртипе танлаштарсан кăштах чакни сисĕнкелет.  Шанатпăр, кĕҫех лару-тăру ырă енне куҫасса», - тенĕ сăмаха пĕтĕмлетнĕ май Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев.

Фоторепортаж