Ака уйăхĕн 22-мĕшĕнче Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев «ЧЭАЗ» АО пулнă, предприятийĕн ĕҫĕпе паллашнă.  Заводра ĕҫлесе пысăк хисепе тивĕҫнисене организацийĕн ертӳлĕхне Чăваш автономи облаҫне 100 ҫул ҫитнине халалланă медале парса чысланă.  

2019 ҫул пĕтĕмлетĕвĕсем тăрăх, предприятийĕн ĕҫченĕсем Пĕтĕм Раҫҫей шайĕнче ирттернĕ XX-мĕш ăмăртусенче «Электротехника» номинацире «Ҫулталăк инженерĕ» конкурсра ыттисене кая хăварса мала тухнă.   «НИЦ ЧЭАЗ» ТМЯО проектсемпе ĕҫлекен управленийĕн пуҫлăхĕ,  «Ресурсного центра ЧЭАЗ»  АО преподавателĕ Евгений Маршруткин «Раҫҫейри профессионаллă инженер» ята ҫĕнсе илнĕ, ыттисемшĕн паха тĕслĕх пулса тăнă.   

Ҫамрăк инженерсем хушшинче пысăк ăсталăха кăтартса параканĕ «ЧЭАЗ»  АО ĕҫлекен Федор Ятманов пулнă. Ăмăртăвăн пĕрремĕш турĕнче хăйне тивĕҫлĕ кăтартса пама пĕлнĕ.  

Олег Николаев инженерсем чăнласах та, пысăк хисепе тивĕҫлĕ тесе тепĕр хут ҫирĕплетсе каланă.  Предприяти паянхи пурнăҫ таппипе тӳр килсе ĕҫлесе пытăр, таварсен пахалăх шайĕ ӳссе хăватлантăр тесе специалистсем ырми-канми вăй хунине асăннă. Пысăк профессионалсем пулни куҫкĕретех тенĕ вĕсем пĕр харăс тĕл пулнă самантра.

«Ҫулталăк  инженерĕ – 2019» XX-мĕш пĕтĕм Раҫҫей шайĕнче иртнĕ конкурса предприятинче тимлекен 5 специалист хутшăнса, заводăн чысне ҫӳллĕ шая ҫĕкленĕ. Кунсăр пуҫне Чăваш патшалăх ял хуҫлăх академийĕнче ăс пухакансем те мала тухнă,  вĕсенчен кашни хăйне евĕр пысăк специалист пулнине ҫирĕплетнĕ. Вĕсене пурне те Чăваш Енĕн юбилей медальне парса хавхалантарнă.