Ака уйăхĕн 27-мĕшĕнче  Чăваш Республикин Пуҫлăхĕн тивĕҫĕсене вăхăтлăх пурнăҫлакан Олег Николаев кашни эрнере пулакан планеркăна ирттернĕ. Вăл хăйĕн сăмахĕнче регионта пĕтĕмĕшле вăтам пĕлӳ паракан шкулсен строительство ĕҫĕсене палăртса хунинчен чылай маларах пунăҫланасса пĕлтернĕ. Калăпăр «Университет» микрорайонта кăҫалах объектăн строительство ĕҫне тытăнасса хыпарланă.

«Хальхи вăхăтра Шупашкаршăн чи пĕлтерĕшлĕ ĕҫĕн строительстви пирки ыйтăва ҫирĕп тишкеретпĕр. Северо-западнăй микрорайонта пысăк та капмар 1500 ача вырнаҫтармалăх шкул ҫĕклесшĕн.  Ыйтăва татса панă тенĕпе пĕрех.  Ҫак кунсенчех ыйту уҫăмланасси те куҫкĕретех, объекта хăпартса лартма та пуҫлĕс специалистсем», - тенĕ вăл.

Кăҫал ҫуртăн строительство ĕҫне тытăнасшăн, РФ Ҫут ĕҫ министерствипе те тĕплĕ калаҫса татăлнăпа пĕрех, финанс тĕлĕшĕнчен тĕрев парссине пăхса тухаҫҫĕ хальхи вăхăтра. 

Хатĕрленӳ ĕҫĕсене вăраха тăсмасăрах пуҫлама Шупашкар хула администрацийĕн ертӳлĕхне чĕнсе каланă Чăваш Республикин Пуҫлăхĕн тивĕҫĕсене вăхăтлăх пурнăҫлакан. «Объекта пысăк тимлĕх уйăрмалла.  Хулари Мускав районĕнче пурăнакансем чăтăмсăррăн кĕтеҫҫĕ шкула.  Вĕренӳ учрежденийĕсенче ачасене иккĕмĕш сменăпа вĕрентнĕшĕн ашшĕ-амăшĕсем пăшăрханса кулленех ыйту ҫĕклеҫҫĕ. Енчен те вара палăртнă шкул хута кайсан, вал районта иккĕмĕш сменăпа ачасене вĕрентесси пăрахăҫланĕ», - тесе хушса каланă Олег Николаев.

Палăртнă ĕҫсем пĕтĕмпех планпа килĕшӳллĕн пулсан, вăл шкулăн строительство ĕҫĕн хăвăртлăхне ӳстерме пулать, тен вара сентябрь уйăхĕн 1-мĕшĕ тĕлне шкул алăкĕсем ачасем валли уҫăлĕс те.

Шупашкар хула администрацийĕн пуслăхĕ Алексей Ладыков хăйĕн сăмахĕнче, объектăн проектпа смета ĕҫ хучĕсене ку эрне вĕҫĕнче е тепĕр эрне пуҫламăшĕнче экспертиза тухма тăратасси пирки подрядчиксем пĕлтернине каланă.

Палăртса хăваратпăр, кăҫал ҫĕнĕ вĕренӳ ҫулĕ тĕлне Шупашкарта «Ҫĕнĕ хула» микрорайонта шкулсем хута кайĕҫ, Куславкка районĕнче те ачасене ҫĕнĕ вĕренӳ учрежденийĕ хапăл тусах кĕтесси паллă.

Фоторепортаж