Чӑваш Ен Пуҫлӑхӗн тивĕҫĕсене вăхăтлăх пурнăҫлакан Олег Николаев  ака уйӑхӗн 8-мӗшӗнче республика Правительствин ларӑвне уҫнӑ май, пӗчӗк тата вӑтам бизнес субъекчӗсене пулӑшу памалли мерӑсем пирки ятарлă службăна указ хатӗрлеме хушнă.

"Иртнӗ эрнере экономикӑпа социаллӑ ҫирӗплӗхе тивӗҫтермелли комплекслӑ план йышăннă. Указпа предпринимательлӗх ӗҫ-хӗлне хавхалантармалли ятарлӑ мерӑсем ҫирӗплетме сӗнетӗп, ҫав шутра налуксемпе те ҫăмăллăхсем пулмалла,  вӗсене пирĕн Чӑваш Республикинче ҫывӑх вӑхӑтра пурнӑҫламалла", - тенӗ регион Пуҫлăхĕн тивĕҫĕсене вăхăтлăх пурнăҫлакан.

Палӑртса хӑварар, иртнӗ эрнере Олег Николаев видеоконференци режимӗнче республикӑри предприятисен ертӳҫисемпе канашлу ирттернӗ. Вăл тĕрлĕ ыйтусене уҫăмлатнă.

Ӗнер суту-илӳ центрӗсен хуҫисемпе канашлу пулса иртнӗ,  патшалăх енчен куҫакан  тĕревсем пирки сӳтсе явнă.

Ыран, ака уйăхĕн 9-мӗшӗнче, Чӑваш Ен Пуҫлӑхӗн тивĕҫĕсене вăхăтлăх пурнăҫлакан «тӳрĕ лини» кăларăм вăхăтĕнче вак тата вăтам  бизнеса пулăшу памалли мерăсем пирки ыйтусене хуравлать.  Коронавирус лару-тăрăвĕ пирки те сӳтсе явĕҫ.