«Хăвăн ăсталăхупа тĕнчене илемлет!» Çапларах янăрать «WorldSkills» чемпионатăн девизĕ. Чăваш Республики çамрăксем 9-мĕш çул ĕнтĕ çак проекта хутшăнса хăйсен ăсталăхне ӳстереççĕ. Кăçал финал пĕтĕмлетĕвĕсем тăрăх, «Çамрăк профессионалсен» 9-мĕш Наци чемпионатĕнче Чăваш Енри пĕрлештернĕ ушкăн 8 медаль илме тивĕç пулнă. Çĕршыври 61 регион хушшинче пирĕн регион 13-мĕш вырăнта. Кăçалхи чемпионата çĕнĕлĕх нумай кĕртнĕ. Çамрăксем 17 компетенципе тупăшнă. Яшсемпе хĕрсем хăйсене робототехникăра, электроникăра, апат пĕçерес, тимĕр хĕртсе шăратас, кăмака тăвас ĕçре тĕрĕсленĕ. Шăпах çак компетенцисенче тупăшакансем кашни çул нумай. Кăшăл вирус алхаснине шута илсе республика Пуçлăхĕ Олег Николаев ĕç профессийĕсен чемпионатне хутшăнакансемпе видеоконференци мелĕпе калаçрĕ. Конкурсра палăрнă Чăваш Енри экспертсене, вăтам професси паракан 7 вĕрентӳ учрежденийĕн студенчĕсемпе вĕрентекенĕсене чысларĕç. Ăмăртура Чăваш Республикин пĕрлештернĕ ушкăнĕ 3 ылтăн, 2 кĕмĕл, 3 бронза медаль илме тивĕçнĕ. Унсăр пуçне 12 яш-кĕрĕме профессионализмшăн медальонсем парса чысларĕç. – Ăмăртусенче çак юхăм самай аталанса пынă май, паллах, çамрăксен нумайрах та нумайрах интерес пулса пырать çак юхăм патне. Унсăр пуçне пĕр-пĕринпе ăмăртса çамрăксем, паллах, çĕнĕрен те çĕнĕ меслетсем майсем çак хăйĕн профессисене пурнăçа кĕртсе пымалли меслетсене тĕпчесе пурнăçа кĕртме вĕренсе пыраççĕ. Çавăнпа та çак юхăма самай аталантармалла. Пирĕн Раççей Федерацийĕн команди те тĕнчере пĕрремĕш вырăн йышăнни, ман шутпа, пире те хавхалантарать. Чăваш Республикин Правительстви çак юхăма пĕтĕмĕшле пурнăçа кĕртсе пыма тивĕçтерсе пырать. Малалла та çав шухăшсемпех пурăнатпăр.