Шупашкарти Чăваш патшалăх филармонине  йĕркеленĕренпе кăҫал 85 ҫул ҫитнĕ. Паллă пулăма хатĕрленсе культура керменĕ питĕ илемленнĕ, ҫурта хута яма, тĕпрен ҫĕнетсе улăштарма Раҫҫей Федерацийĕн Правительстви пысăк тĕрев панă. «Культура» наци проекчĕпе килĕшӳллĕн, объектăн сăн-сăпатне хăтлăлатнă, условисене улăштарнă, культура валли кирлĕ мĕнпур хатĕрсемпе тивĕҫтернĕ.   

«Палăртса хунă ĕҫсене туллин пурнăҫа кĕртесси тĕп тĕллевсенчен пĕри пулнă.  Кунта пухăнакан халăх валли пĕтĕмпех чун-чĕрене уҫса яма ҫителĕклĕ условисем йĕркеленĕ.  Пултарулăха аталантарма, культура пайне ҫӳле ҫĕклеме хăтлă условисем хатĕрленĕ. Халăхшăн тăрăшакансен ĕҫне хамăр республикăра анчах мар, унăн тулашĕнче пурăнакансене те савăнтарассине ĕненетпĕр.  Хамăр енчен мĕн кирлине яланах йĕркелесе пама хатĕр», – тенĕ хăйĕн ум сăмахĕнче уява пухăннисене саламланă май Чăваш Ен Пуҫлăхĕ. Кулленхи тăрăшуллă ĕҫшĕн тата профессие чунпа парăннăшăн чĕререн тав тунă пурне те. Артистсем  туса пыракан ĕҫ – тăван халăхăн хăйне евĕрлĕ культурине, истори еткерлĕхне, тăван чĕлхене аталантарса ламран лама парса пыма витĕм кӳнине те палăртнă Пуҫлăх. Кăмăл-сипет пуянлăхне упранин – хакĕ питĕ пысăк тесе  хакланă вăл.

   Мероприятине пуҫтарăннисене РФ халăх артисчĕ Морис Яклашкин ертсе пыракан Чăваш патшалăх академи симфони капелли хаваслă юрă-кĕвĕ парнеленĕ.   

Ҫурта реконструкцилес ĕҫе хутшăннисене пурне те мухтаса тав сăмахĕсем каланă Чăваш Республикин Пуҫлăхĕ. «СЗ «Стройтрест №3»  АО генеральнăй директорне Валерий Семенова Чăваш Республикин Пуҫлăхĕн Тав ҫырăвне парса чысланă.

Хăнасемпе пĕрле ертӳҫĕсем культура керменĕнчи пӳлĕмсене кĕрсе тухнă, условисемпе паллашнă, культура тытăмĕнче усă курăнакансен кĕвĕ хатĕрĕсене курса ĕненнĕ.  Мĕнпур ĕҫе чăнласах та пысăка хурса хакланă.  Чăваш Республикин Пуҫлăхĕ ҫĕнĕ кĕвĕсен хатĕрĕсемпе тухăҫлă ĕҫлесе, халăхшăн тăрăшса мероприятисене йĕркелесе ирттерме чĕнсе каланă.  

Палăртса хăвармала, филармонийĕн фасадне ҫĕнĕрен тунă, инфратытăма тĕпрен  улăштарнă,  концерт кăтартмалли зала хитрелетнĕ, сусăрсене те кĕрсе тухма условисем пĕтĕмпех йĕркелесе панă, видео сăнавсем те ҫителĕклĕ таран вырнаҫтарнă ҫĕнĕ объектра.  Палăртма кăмăллă, пуҫласа ку ҫуртра видео сасă ҫырма хăтлă условисем пуҫарса янă. Пĕр сăмахпа каласан, кунти условисем пĕтĕмпех паянхи пурнăҫ таппине тӳр килеҫҫĕ.

Раҫҫейре Чăваш патшалăх филармонийĕ чи аслисенчен пĕри шутланать.  Кунта республикăн культура пайĕ тĕпрен сăнарланнă тесен те йăнăшах мар пулĕ.  Професси пĕлĕвĕ илнĕ ҫынсем хăйсене шанса панă ĕҫе тӳрĕ кăмăлпа, йăла-йĕркесене пăхăнса, культура еткерне ҫӳле ҫĕклесе пыма пикенеҫҫĕ.  Пĕрре мар халăх ҫирĕплетсе каланă Чăваш патшалăх филармонийĕнче  тăрăшакансем пирки.

Кĕскен: ҫулсерен филармони вуншар ҫĕнĕ мероприяти хатĕрлет халăх валли. Пултарулăх ушкăнĕсем ҫулталăкра 250 концерт йĕркелеҫҫĕ, вĕсене курма килес текенсен йышĕ те кулленех ӳссе пыни куҫ кĕретех, кăтарту – 100 пинрен те иртсе кайни ҫакнах ҫирĕплетсе парать.