Паян Чăваш Наци вулавăшĕнче «Культурăллă канмалли кунсем» акцие халалланă брифинг иртрĕ. Ăна ЧР Культура министрĕ Светлана Каликова ертсе пынă.

Раççей Культура министерстви пуш уйăхĕн 6-8-мĕшĕсенче «Культурăллă канмалли кунсем» акци ирттерет. Унта Чăваш Ен те хутшăнать. Ăна Раççейри халăхсен культура еткерлĕхĕн çулталăкне, çавăн пекех Пĕтĕм тĕнчери Хĕрарăмсен кунне халалланă.

— Çак акцие республикăри театрсем, музейсем, вулавăшсем, концерт организацийĕсем, çавăн пекех хулари тата районсенчи культура керменĕсемпе çурчĕсем хутшăнĕç. Вĕсем çитес канмалли кунсенче те ĕçлĕç, — палăртнă Светлана Каликова.

Сăмахран, çак кунсенче музейсене тӳлевсĕрех кĕме май пулĕ. Пушăн 7-8-мĕшĕсенче Ӳнер музейĕнче тата хальхи ӳнер центрĕнче Уçă алăксен кунĕ иртĕ. 15-35 çулсенчи хăнасем кунти экспозицисене тӳлевсĕрех курма пултарĕç. Çавăн пекех вĕсене «Искусство Чувашии. Истоки, развитие, современность» куравпа та паллаштарĕç. Унсăр пуçне пушăн 7-мĕшĕнчех Наци, Чăваш тĕррин, Чапаев, Çар Мухтавĕн музейĕсенче те Уçă алăксен кунĕ иртĕ. Пушăн 6-8-мĕшĕсенче Шуршăлти Космонавтика музейĕнче те тĕрлĕрен кăсăклă экскурси ирттерĕç.

«Культурăллă канмалли кунсем» акцин программи анлă. Унпа тĕплĕнрех Культура министерствин, культура учрежденийĕсен сайчĕсенче, çавăн пекех социаллă сетьсенче паллашма пулать.