Илья Ульянов ячĕллĕ Чăваш патшалăх университетĕнче вырнаçнă «Раççей – малашлăх çĕршывĕ» центр çамрăксене, предприяти ертӳçисене, регионти влаç тытăмĕнче тăрăшакансене пĕр çĕре пĕрлештернĕ. Çакăн евĕр компетенци центрĕсем çĕршывăн тĕрлĕ кĕтесĕнче уçăлаççĕ. Чăваш Енре йеркеленĕ лапам 54-мĕш.

Çак центр республикăри ачасене шкулта вĕреннĕ чухнех професси суйласа илме, килĕшекен ĕçе алла илме пулăшма тивĕç. Республика Пуçлăхĕ Олег Николаев çамрăксене малашне те пултаруллă, хастар пулма, ума çирĕп тĕллевсем лартса вĕсене пурнăçлама ăнăçу, сывлăх сунчĕ. Раççей Федерацийĕн Патшалăх Думин комитечĕн ертӳçи Анатолий Аксаков хăть те мĕнле ĕçе те юратса пурнăçламалла, çĕршыва юрăхлă пархатарлă ĕçсем тумалла терĕ.

«Раççей – малашлăх çĕршывĕ» лапама хутшăнса ĕçлени федераци шайĕнче пурнăçа кĕрекен проектсене кĕмелли ăнăçлă мел. Вĕсенчен пĕри – «Çул çӳреврен те ытларах» проект. Унпа килĕшӳллĕн Атăлçире пурăнакан студентсем тĕрлĕ региона тухса çӳреççĕ. Çак кунсенче вĕсем Чăваш Енĕн пуян культурипе паллашĕç. Çурла уйăхĕн 23-25-мĕшĕсенче Чăваш патшалăх университетĕнчи компетенцисен центрĕнче «Студентсемпе пĕр хум çинче» пуçару иртет. Çак программăпа вĕренсе тухакансене цифра сертификачĕпе чыслаççĕ. Электронлă документ пулăшнипе ĕç тупма çăмăлрах пулĕ. «Раççей – малашлăх çĕршывĕ лапамра 26 программа пурнăçланать. Вĕсем кашниех çамрăксене усă кӳрессе шанаççĕ çак тытăма ертсе пыракансем. Хальхи вăхăтра Раççейри 26 регионта компетенцисен 54 центрĕ уçăлнă, кăçал тепĕр 20 центр йĕркелеме палăртнă.

Тĕплĕнрех...