Чăваш Республикинче пурăнакан арçынсем ятарлă çар операцине хутшăнаççĕ. Тăван çĕршыв хӳтĕлевçисен çывăх çыннисене медицина, социаллă пулăшу парасси пирки паян Правительство çуртĕнче калаçрĕç.

Ятарлă çар операцине хутшăнакансен каялла таврăнсанах тĕрлĕ енлĕ пулăшу илме май пур. Медицина енĕпе ыйту пулсан вĕсен тӳрех Чăваш Енри вăрçă ветеранĕсен клиника госпитальне çул тытмалла. Реабилитацишĕн малашне Шупашкарти 1-мĕш клиника больници, Федерацин травмотологи, ортопеди тата эндопротезировани центрĕ, республикăри кардиологи диспансерĕ яваплă пулĕç. Паттăрсене телемедицина пулăшăвĕпе те тивĕçтерме хатĕр. «Надежда» санаторий те çар операцине хутшăннă çынсене йышăнма пуçлать, аппаратура йăлтах пур. Кашни çемьен хăйĕн социаллă паспорчĕ пулмалла. Ку ĕçе муниципалитетсем пурнăçлаççĕ.

Пĕтĕмĕшле вара вĕсемшĕн Чăваш Республикин ĕç тата социаллă хӳтлĕх министрĕ Алена Елизарова ертсе пыракан ведомство яваплă пулĕ. Унта специалистсем çемьери лару-тăрăва шута илĕç, кашнине мĕнле пулăшу, социаллă хӳтлĕх илме пултарнине палăртĕç.