Машина хыççăн машина çула тухать. Мобилизациленнисем хатĕрленекен центрсене республикăран час-час пулăшу каять. Черетлĕ çулçӳревре пирĕн пултарулăх ушкăнĕ те пулчĕ.

Ятарлă çар операцине хутшăниччен мобилизациленнисене хатĕрлев центрĕсенче вĕрентеççĕ. Çапăçу вăрттăнлăхĕпе паллашнă чухнех салтаксене кирлĕ хатĕрпе, тум-тирпе тивĕçтереççĕ. Уйăхне сахалтан та икĕ хутчен вĕрентӳ центрне пулăшу илсе килеççĕ.

АЛЕКСАНДР СТЕПАНОВ: «Паян эпир тепĕр пай салтаксене кирлĕ япаласем илсе килтĕмĕр. Тата тепĕр машина кĕтетпĕр. Çавăн пекех полк руководствипе те тĕл пуласшăн. Малалла çыхăну тытса тăма палăртатпăр».

Салтаксене мĕн-мĕн кирлине вĕрентӳ центрĕн ертӳлĕхĕ хатĕрленĕ список тăрăх пухаççĕ. «Пĕрле» фонд урлă та хальхинче пулăшу çитрĕ. Квадракоптер, тепловизор, инçĕшне кăтартакан хатĕр, раци тата ытти те – çапăçу хирĕнче кирлĕ япаласем илсе килнĕ. Темиçе пикап машина та салтаксене самай пулăшмалла. Ку юлашки пулăшу мар. Çитес вăхăтра мобилизациленнисене хатĕрлекен центра тата та машинăсем çула тухĕç.