Промышленность продукцине саккуна пăсса хатĕрлекенсене тата сутакансене тупса палăртассине патшалăх шайĕнче тимлеççĕ. Ку енпе яваплисем мĕнле ĕçленине час-час тавар çарăнăшне тĕрĕслекен комисси ларăвĕнче пăхса тухаççĕ. Хальхинче социаллă çуртсене мĕнле апат-çимĕçпе тивĕçтернине тишкерчĕç.

Чăваш Енре кăçал апат-çимĕç мĕнле пахалăхра пулнине тĕрĕслеме ветеринари тата фитосанитари сăнавĕн федераллă службин Чăваш Республикинчи тата Чĕмпĕр облаçĕнчи управленийĕ 139 проба илнĕ. Тĕпченĕ хыççăн 18 тĕслĕхре çитменлĕхсем палăртнă. Аш-какай тата сĕт пахалăхĕ тивĕçлĕ шайра пулман. 2021-мĕш çулта тĕрĕслеме илнĕ кашни 15 пробăра çитменлĕх палăртнă пулсан, кăçал вара кашни 8-мĕш тĕрĕслевре чăрмав тупăннă.

Управлени специалисчĕсем шкулпа ача сачĕсене, интернатсене, училищĕсене илсе пыракан продукцие те тишкереççĕ. Социаллă çуртсенчи 32 тĕпчеврен 10-шĕнче çитменлĕхсем палăртнă. «Меркурий» системăпа ĕçлени пахалăхсăр продукцие саракансемпе кĕрешме май парать. Тĕслĕхрен, выльăх-чĕрлĕх продукципе тивĕçтерекен 20 пĕрлешӳрен 6-шĕ йĕркене пăсать иккен. Ларура çитменлĕхсемпе ĕçлекен предприятисем тĕлĕшпе куç хупмалла маррине каларĕç. Енчен те пĕрлешӳ паха апатпа тивĕçтермест пулсан, шар курнă социаллă учрежденисен патшалăх контрактне пăрахăçламалла.