Канаш, Йĕпреҫ тата Вăрнар районĕнче вырнаҫнă пĕтĕмĕшле вăтам пĕлӳ паракан хăш-пĕр палăртса хунă шкулсене тĕпрен юсаса ҫитерес ĕҫе вĕҫленĕ.

Асăннă объектсене 2023 ҫулта пуш уйăхĕн 31-мĕшĕччен вĕрентӳ тытăмне модернизацилессипе йышăннă программăна кĕртнĕ пулнă. Кун пирки паян канашлура Чăваш Республикин вĕренӳпе ҫамрăксен политикин министрĕ Дмитрий Захаров пĕлтернĕ. Ҫуртсене тĕпрен юсассипе ҫыхăннă ыйтусене, проектпа смета ĕҫ хучĕсене хатĕрлессине, тавралăха тирпей-илем кĕртессине пăхса тухнă Правительство ҫуртĕнче паян ирттернĕ канашлура.

«Шупашкар хулинчи Олег Беспалов ячĕллĕ пĕтĕмĕшле вăтам пĕлӳ паракан 7-мĕш №-лĕ шкула юсас ĕҫе 2022 ҫулта пуҫланă. Палăртнă тăрăх, кăҫал ҫурла уйăхĕн 18-мĕшĕ тĕлне объекта хатĕрлесе ҫитермелле. Шупашкар хулинчи пĕтĕмĕшле вăтам пĕлӳ паракан 10-мĕш №-лĕ шкула 2023 ҫулта юсама плана кĕртнĕ», – хушса каланă вăл.

18 объектран виҫҫĕшĕнче хальлĕхе ҫитменлĕхсем пуррине палăртнă. Ыйтăва ҫирĕп тĕрĕслеве илнине пĕлтернĕ ведомство ертӳҫи.  Шупашкар хулинчи пĕтĕмĕшле вăтам пĕлӳ паракан 7-мĕш №-лĕ шкулта, Шупашкар районĕнчи пĕр шкулпа Ҫĕнĕ Шупашкарти 5-мĕш №-лĕ шкулта хальлĕхе хăш-пĕр йывăрлăхсем пуррине хыпарланă министр.   

Шкулсене тĕпрен юсас ĕҫ епле  пурнăҫласси пирки 2022 ҫулта раштав уйăхĕнче хăш-пĕр ĕҫсене туса ирттернине палăртнă Дмитрий Захаров. «Хăш шкулсенче ачасене вĕрентмеллине палăртса хунă. Ашшĕ-амăшĕсемпе те ыйтусене тĕплĕн сӳтсе явнă. Ҫулсен карттине хатĕрленĕ», – тенĕ вăл.   Нарăс уйăхĕн 1-мĕшĕнчен палăртса хунă объектсенче тĕпрен юсас ĕҫе тытăнмалла. Кун пирки те хыпарланă министр.  

Пĕтĕмпе 18 шкула ҫĕнетмелле, анчах та вĕсенчен 8-шĕ валли кăна проектпа смета хучĕсене хатĕрлесе тăратнă.   

Шкулсен ҫывăхĕнчи лаптăксене тирпей-илем кĕртессипе ҫителĕклĕ таран ĕҫ хучĕсене хатĕрлеменнине асăрхаттарнă министр. Ăна пула, республика хыснинчен куҫакан укҫа-тенкĕне тивĕҫтерессипе хăш-пĕр ҫĕнĕлĕхсем кĕртме тивнине асăннă вăл.  Графика кăштах тӳрлетӳсем кĕртсе хăварнине те асăннă вăл сăмаха малалла тăснă май.  

«2021ҫулта кашни харпăр хăй ҫине яваплăх илнĕ. Тĕпрен ҫĕнетсе улăштарнă шкулсем ачасене вĕрентме хăтлă пулмалла. Объектсене пĕтĕмпех паянхи пурнăҫпа тӳр килсе тăмалла условисем. Тавралăха тирпей-илем кĕртесси пирки ыйтăва хускатнă май, спорт тӳремĕсем пирки те чарăнса тăмалла, вĕсем ҫине те тимлĕх уйăрмалла.  Стадионсене республика программипе килĕшӳллĕн хута ярса пыма тăрăшмалла. Ачасене валли те ашшĕ-амăшĕсене валли те пĕр тан хăтлă условисем пулсан аван.  Сахал мар тĕрлĕ мероприятисем иртереҫҫĕ стадионсенче. Курма пыракансене валли те условисем хатĕрлесе парсан чаплă пулнă пулĕччĕ. Пирĕн тĕллевсем пысăк, вĕсене туллин пурнăҫа кĕртсе пыма ҫителĕклĕ таран бюджетра укҫа-тенкĕ пăхса хăварнă.  Документсене пĕлсе, тивĕҫлĕ хатĕрлесе пырсан, укҫа-тенкĕ ыйтăвĕ те часрах уҫăмланасси паллă. Пĕр сăмахпа каласан, пахалăх ҫине пурин те тимлĕх уйăрмалла», – тесе каланă хăйĕн сăмахĕнче Чăваш Республикин Пуҫлăхĕ Олег Николаев республикăри район тата хула администрацийĕсен пуҫлăхĕсене.   

Нумай ҫулсене валли йышăннă контрактсемпе укҫа-тенкĕ мĕн чухлĕ кирлĕ пулма пултарасси пирки ыйтăва та тĕрĕслеве илме каланă Чăваш Ен Пуҫлăхĕ Олег Николаев. Пулать тепре чухне, таварсен хакĕсем ӳссе пыни. Ăна кура хăш-пĕр тӳрлетӳсене те кĕртме тивет.

2022-2023 ҫулсенче шкулсене тĕпрен юсама 31 шкула палăртнă, тата та тепĕр 22 шкула ҫĕнетсе улăштарма хушма йышăну тунă, вĕсене валли федераци хыснинчен 1,7 млрд тенкĕ уйăрнă.