Хĕлле çитсен хăшĕсем шăнса пăсăлнипе аптăраççĕ, теприсен вара грипп чирне чăтса ирттерме тивет. Кăшăллă вирус та алхасма чарăнман-ха. Кăрлач уйăхĕнче чирлекенсем йышланнă. Çак ыйтăва Правительство çуртĕнче иртнĕ ларура та хускатрĕç.

Чăваш Енре кăрлач уйăхĕнче вирус инфекцийĕпе тата гриппа 5 000 ытла çын чирленĕ тесе палăртнă. Малтанхипе танлаштарсан иртнĕ эрнере чирлекенсен йышĕ 2,9 процент ӳснĕ. Тухтăрсем ачасен те час-час ӳт температури хăпарнине шута илеççĕ. Йăшнисенчен 60 проценчĕ – вĕренекенсем е ача садне çӳрекенсем. Шупашкарта чирлекенсем йышлă. Кăшăллă вирус шар кăтартма чарăнмасть-ха. Вăл алхасма пуçланăранпа республикăри 108 000 ытла çынна çак мур çакланнине шута илнĕ, вĕсенчен 13 000 – çул çитмен ачасем. Çулталăк вĕçĕнче кăшăллă вируспа чирлекенсем сахалтарахчĕ, кăрлач уйăхĕнче вĕсем йышланнă. 18 çул тултарманнисем те чирлеççĕ, ку уйăхра 39-шне «Ковид» диагноз лартнă. Йашнисенчен 90 ытла проценчĕ чире çăмăллан ирттерет, килтех сипленет.

Паян Чăваш Енре 35-шĕ çеç больницăра сывалать. Чиртен сыхланмалли мелсенчен пĕри – вакцинаци. Кăшăллă вирусăн çĕнĕ штамĕнчен палăртнисенчен 51 проценчĕ сыхлăх эмелне яртарнă. Шупашкарпа Канаш хулисенче, Патăрьел, Комсомольски, Красноармейски, Сентĕрвăрри, Херлĕ Чутай тăрăхĕсенче ку ĕçе лайăх йĕркеленĕ. Улатăр хулипе тăрăхĕнче вара – япăх кăтарту. Ларура чирлес мар тесен тухтӑрсен сӗнӗвӗсене шута илмелли пирки чарăнса тăчĕç. Сывӑ пурнӑҫ йӗркине пӑхӑнмалла, урамра уҫӑлса ҫӳремелле. Ҫын нумай вырӑнтан пӑрӑнма тӑрӑшмалла. Хамӑра хамӑр упрамаллах.