Шупашкарта кĕçех патшалăх фончĕн «Çĕршыв хӳтĕлевçи» филиалĕ уçăлмалла. Унта ĕçлекенсем ятарлă çар операцинчен таврăнакан салтаксене пулăшĕç. Ĕçе вырнаçмалла-и е психолог пулăшăвĕ кирлĕ-и – центр алăкĕ çулла уçăлмалла.

Шупашкарти Мускав проспектĕнчи 3-мĕш çуртра паян хĕрӳ тапхăр. Шалта пӳлĕмсенче юсав пырать, кирлĕ сĕтел-пуканпа оборудование туянаççĕ. Салтаксене «пĕр чӳрече» мелпе пулăшу парĕç. Кунтах нумай функциллĕ центр уйрăмĕ, ĕçпе тивĕçтерекен центр, психологи пулăшăвĕ кӳрекен пӳлĕм, сывалма кирлĕ хатĕр-хĕтĕре тара паракан вырăн тата ытти те пулĕ. Ятарлă çар операцине хутшăнакан салтаксемпе вĕсен çемйисене пĕр вырăнтах тĕрлĕ пулăшу пама хатĕрлеççĕ.

АЛЕНА ЕЛИЗАРОВА: «Раççей Президенчĕн Хушăвĕпе килĕшӳллĕн республикăра ятарлă çар операцине хутшăнакан салтаксене социаллă тата медицина пулăшăвĕпе тивĕçтерес тĕллевпе Çĕршыв хӳтĕлевçисем фонд уçăлать. Паянхи кун юсав ĕçĕсем пыраççĕ. Хăйĕн алăкне вăл июнĕн 1-мĕшĕнче уçĕ».

Фондра пĕтĕмĕшле 30 социаллă коордианатор ĕçлемелле. Паян вĕсене вĕрентес, хатĕрлес тапхăр пырать. Вĕсем пур муниципалитетра та пулĕç.