Сывлӑх сыхлавӗн хисеплӗ ӗҫченӗсемпе отрасль ветеранӗсем!

 Сире професси уявӗпе – Медицина ӗҫченӗн кунӗ ячӗпе саламлатӑп!

 Медицина ӗҫченӗ – професси кӑна мар, вӑл чун туртӑмӗ те. Пирӗн республикӑра пурӑнакансен сывлӑхӗ тата отрасль аталанӑвӗ сирӗнтен килет.

Паян эпир сирӗнпе пӗрле лайӑх пахалӑхлӑ та юрӑхлӑ медицина туса хурас тесе ӗҫлетпӗр. Наци проекчӗсене, Чӑваш Республикин Социаллӑ пурнӑҫпа экономика аталанӑвӗн стратегине, Чӑваш Республикин Экономика тата социаллӑ пурнӑҫ ата­ланӑвӗн комплекслӑ программине пурнӑҫлани сывлӑх сыхлавӗн отрасльне малалла аталантарасси ҫине пысӑк витӗм кӳчӗҫ.

Чӑваш Енӗн сывлӑха сыхлас ӗҫ отрасльне укҫа-тенкӗпе тивӗҫтересси юлашки пилӗк ҫул хушшинче 21 процент чухлӗ ӳсрӗ, 2018 ҫулта ку кӑтарту 21,4 миллиард тенкӗ пулнӑ пулсан, 2022 ҫулта 26 миллиард тенкӗпе танлашрӗ. Медицина ӗҫченӗсене социаллӑ пулӑшу пама 335,3 миллион тенкӗ уйӑрнӑ, ҫакӑ отрасле хушма майпа тата 1438 медицина ӗҫченне явӑҫтарма май пачӗ.  

Чӑваш Ен паян цифра аталанӑвӗн рейтингӗнче ҫӗршыври мӗнпур субъектсем хушшинче иккӗмӗш вырӑнта тӑрать. Медицина пулӑшӑвӗ памалли виҫӗ шайлӑ тытӑм ӑнӑҫлӑ аталанать, сиплев учрежденийӗсем техника тӗлӗшӗнчен пуянланаҫҫӗ. Пысӑк технологиллӗ медицина ӗҫӗ лайӑхланать. Ял ҫӗрӗнче малтанхи медицинӑпа санитари пулӑ­шӑвӗн курӑмлӑ шайри юрӑхлӑхне тивӗҫтернӗ. 

Регионта пурнӑҫ тӑршшӗн кӑтартӑвӗ пысӑкланнӑ, пепкесем вилеслӗхӗн шайӗ вара – ҫӗршывра чи пӗчӗккисенчен пӗри. Чир-чӗртен асӑрхаттарас ӗҫри сирӗн паха опытӑрпа ытти регионсем те усӑ кураҫҫӗ. 

Ҫак ҫитӗнӳсене медицина ӗҫченӗсен кулленхи ырми-канми тӑрӑшулӑхӗ, ӗҫе пӗлсе йӗркелени тата йӗркене ҫирӗп пӑхӑнни тума пулӑшнӑ.

Пархатарлӑ ӗҫӗршӗн, ырӑ кӑмӑллӑ тата хӗрхенӳллӗ пулнӑшӑн сире пурсӑра та тав тӑватӑп, ҫирӗп сывлӑх, ырлӑхпа телей тата малашнехи ҫитӗнӳсем сунатӑп!

Чӑваш Республикин Пуҫлӑхӗ                          Олег Николаев