Чăваш Республикин Пуҫлăхĕ Олег Николаев конференци йĕркелӳҫисене мухтанă, паянхи пурнăҫ таппишĕн уйрăмах ҫакăн евĕр тĕлпулусем пĕлтерĕшлĕ пулнине палăртнă.  Пĕр-пĕрин паха ĕҫ опычĕпе паллашма аван, ĕҫлĕ ҫыхăнусене сарма та меллĕ тесе асăннă вăл.   

«Мĕнпур вăя пĕрлештерме пĕлмелле, пĕр-пĕрин паха ĕҫ опычĕсене тĕпе хурса ҫĕнĕлле ĕҫлесе пыма тăрăшмалла.  Паянхи пурнăҫ ыйтакан проектсене хатĕрлемелле», - тесе каланă хăйĕн сăмахĕнче Чăваш Республикин Пуҫлăхĕ Олег Николаев.  «Пурнăҫ мĕнле пуласси пĕтĕмпех хамăртан килет.  Конференцире сирĕн ҫĕнĕ аталану ҫул-йĕрĕсене вăй илтерме хушма майсем пуласса шанатпăр», - тенĕ вăл.

Ҫуллахи  илемлĕ мероприятисенчен пĕри – фейерверксен фестивалĕ. Вăл ҫав тери илĕртӳллĕ  тата  хитре иртет.  Палллă пулăма республикăра пурăнакансемпе хăнасем кăна мар, Атăлҫи федераци округне кĕрекен мĕнпур субъектсенчен пуҫтарăнаҫҫĕ ҫынсем.    

«Рапид-Фейерверк» Раҫҫейри пиротехника ассоциацийĕсен президенчĕ Вареных Николай  сăмаха малалла тăснă май, конференцийĕн кун йĕркипе килĕшӳллĕн, регионта тăватă тӳрем йĕркеленине хыпарланă.  Унта ҫĕршыври чи паллă пиротехника предприятийĕсем хутшăнма кăмăл тунине асăннă вăл.  Палăртса хунă тăрăх, вăтамран 190 ҫын хутшăнасси те паллă тесе сăмаха малалла тăснă  хăна.    

 «Шупашкар хăйне евĕр ҫав тери илемлĕ хула.  Ыттисемпе танлаштарсан, тен кунта условисем те чаплăрах пулĕ.  Мероприятине ирттерме пире питĕ сирĕн тăрăхра килĕшет.  Кашни ҫынна валли, кăмăл-туйăма ҫĕклеме хаваслă мероприяти йĕркелеме тăрăшăпăр» - тенĕ вăл.  

Аса илтерсе хăваратпăр, «Асамат» фейерверксен фестивалĕ Шупашкарта кăҫалхипе 15-мĕш хут иртет.  Планпа килĕшӳллĕн ăна ҫĕртме уйăхĕн 23-24-мĕш кунĕсенче ирттерме палăртса хунă.