Чăваш Республикин Пуçлăхĕ Олег Николаев Ҫуркуннепе ӗç уявӗ ячӗпе саламлани
Чӑваш Республикин хаклӑ çыннисем!
Сире Ҫуркуннепе ӗç уявӗ ячӗпе саламлатӑп!
«Ĕç вăл – пурнăç илемĕ», – тенӗ чӑваш халӑхӗн ваттисен сӑмахӗнче. Пирӗн халӑхӑн нумай ӗмӗр тӑсӑлакан шӑпи ӗçпе çыхӑннӑ. Этемшӗн хӑйне çимелӗх çӑкӑрпа тивӗçтермелли мел кӑна пулман вӑл. Ӗçре пирӗн несӗлӗмӗрсен тӗрлӗ енлӗ пултарулӑхӗ палӑрнӑ, ача-пӑчана ӗçе юратма хӑнӑхтарса çитӗнтернӗ. Ахальтен мар пирӗн республикӑра пурӑнакансен ӗçченлӗхӗ çинчен регионран чылай аякра та пӗлеççӗ. Вӗсен аллинче ӗç кал-кал пулса пырать.
Ҫу уйӑхӗн 1-мӗшӗ аслӑ çӗршывӑмӑра çӗклеме тӑрӑшнӑ, тӑван чӑваш çӗрӗ çинчи пурнӑçа лайӑхлатса пынӑ нумай ӑрӑва пӗрлештерет. Ҫемьесен ӗç династийӗсем – уйрӑмах кӑтартуллӑ тӗслӗх. Вӗсен опычӗ, хӑнӑхӑвӗ, ӑсталӑхӗ ӑруран ӑрӑва куçса пырать. Ӗçе килӗштернипе, хӑйсен ӗçченлӗхӗпе, шаннине яваплӑха туйса пурнӑçланипе ашшӗ-амӑшӗ ачисене хӑйсем чӑннипех ӗçе парӑннине кӑтартса пырать. Чӑваш Енре пӗр пин ытла ӗç династийӗ шутланать, тупса çирӗплетнӗ пӗрлехи чи пысӑк стаж – ял хуçалӑхӗнче – 1,5 пин çул.
Ҫу уйӑхӗн 1-мӗшӗ тӗрлӗ професси çыннисене пӗрлештерекен, пӗр шухӑшлӑхне палӑртакан уяв. Кашниех хӑйӗн вырӑнӗнче – строительсем, аграрисем, медицина ӗçченӗсем, педагогсем, рабочисем, предпринимательсем тата ыттисем – Чӑваш Ен аталанӑвӗшӗн тата чечекленӗвӗшӗн тивӗçлӗн вӑй хураççӗ.
Анлӑ сарӑлнӑ «Мир! Ӗç! Май!» лозунг пире тахçанхи пекех çӗнӗ çитӗнӳсем тума хавхалантартӑрччӗ! Пурне те çуркуннехи кӑмӑл-туйӑм тата кирек мӗнле пуçарура та çитӗнӳ сунатӑп!
Чӑваш Республикин Пуçлӑхӗ Олег Николаев.