Чӑваш Республикин тӗп хулинче – Шупашкарта сакӑр кун хушшинче Раҫҫейри 9 регионтан пирӗн тӑрӑха килсе ҫитнӗ хӑнасем хӑйсен таварӗсем пирки курма пыракансене паллаштарма кӑмӑл тунӑ. Сӑра пӗҫерекенсем  пӗр-пӗрин паха ӗҫ опычӗпе паллашӗҫ, таварсен вӑрттӑнлӑхӗсем пирки пӗлӗҫ.  Кӳршӗллӗ субъектсенчен килнисем аякри тус-юлташӗсемпе курса калаҫӗҫ, ӗҫлӗ ҫыхӑнусене сарӗҫ.    

Мероприятине культура программипе пуянлатнӑ, наци апат-ҫимӗҫӗпе пухӑннӑ хӑнсене тутанса пӑхма условисем йӗркелесе панӑ. Предприятисемпе организацисем хӑйсен таварӗсене пирӗн тӑрӑха илсе килнӗ, вӗсем пирки тӗплӗнрех паллаштарма килӗшнӗ.  

«Раҫҫейӗн симӗс ылтӑнӗ» фестиваль кӑҫалхипе виҫҫӗмӗш хут иртет. Паллӑ пулӑма кӑҫал та халӑх чылайӑн пухӑннӑ.  Ҫулсерен уява кӑсӑклӑ ирттерме тӑрӑшаҫҫӗ, курма килекенсем те кун пирки пӗрре мар калаҫҫӗ.  Хӑмла лартса ҫитӗнтерессипе пирӗн тӑрӑхра авалтанах юратса ӗҫленӗ. Ку йӑла-йӗркесене малалла та тӑсса пырӑпӑр, ҫитӗнӳсем малалла утма, тата та лайӑхрах кӑтартусемпе палӑрма хавхалантарса пыраҫҫӗ», – тесе каланӑ хӑйӗн сӑмахӗнче Чӑваш Республикин Пуҫлӑхӗ Олег Николаев.    

«Паянхи мероприятинче ҫӗршывра палӑрнӑ чи анлӑ сарӑлнӑ «Балтика» компани те пур.  Паллӑ, Чӑваш Республикин тӗп партнерӗсенчен пӗри шутланать вӑл.  Ку енпе пирӗнпе килӗшсе ӗҫлес текенсем сахал мар.  Ҫак уява ирттернӗ май, пуласлӑхри плансем пирки те сӳтсе явма палӑртса хунӑ.  Хӑмла калӑпӑшне ӳстересси ҫине кӑна мар, унӑн пахалӑх шайӗ ҫине те  тимлӗх  уйӑрӑпӑр. Таварсене паянхи пурнӑҫ таппипе тӳр килтерсе, пысӑк технологисен витӗмлӗхӗ ҫине таянса тирпейлесе кӑларас ыйту та кун йӗркинчех тӑрать.   Чӑваш Республикин Правительстви малашне те асӑннӑ ҫул-йӗрпе тарӑнрах ӗҫесе пыма, палӑртнӑ плансене пурнӑҫа кӗртсе пырассипе ырми-канми ӗҫлеме хатӗр» – тенӗ вӑл.

Ҫӗршыври предприятисен ертӳҫисемпе пӗрле ӗҫлӗ канашлусем ирттерме плана кӗртсе хӑварнӑ.  Наукӑпа влаҫ е тата ытти сферӑри специалистсем пӗр-пӗрринпе канашласа пӗрлехи проектсене пурнӑҫа кӗртесси пирки калаҫса килӗшӗҫ. Кун йӗркинчи тӗп ыйтусемпе Раҫҫей Федерацийӗн Ял хуҫалӑх министерствинче тӑрӑшакансем калаҫӗҫ,  сӑра вӗретекенсен  Пӗтӗм Раҫҫейри Ассоциацийӗн специалисчӗсем те хӑйсен паха опычӗсемпе паллаштарӗҫ. Ӗҫ программипе килӗшӳллӗн, республикӑра стратегильлӗ сесси ирттерме палӑртнӑ. Халӑхпа ҫыхӑну тытакан специалистсем, блогерсем, массӑллӑ информаци хатӗрӗсенче тӑрӑшакансем валли кӑсӑклӑ материалсем пуласси куҫ кӗретех пулӗ.

Раҫҫей Федерацийӗн Патшалӑх Думин депутачӗ Алла Салаева сӑмаха малалла тӑснӑ май, фестиваль пирӗн тӑрӑха сумлӑ хӑнасене пуҫтарӑнма витӗм кӳнине палӑртнӑ, пӗр чӑмӑра пухӑнса, пӗр-пӗрин паха ӗҫ опычӗпе  паллашма аван пуласса каланӑ.   Мероприяти хӑйне евӗр паха пулнине, курма килекенсене валли лайӑх кану пулассине шанса каланӑ вӑл. Ӳлӗмрен те фестиваль пӗлтерӗшӗ пысӑк пултӑр, вӑл ҫӗршыв шайӗнче анлӑ сарӑлтӑр тесе те асӑннӑ депутат.   

Палӑртса хӑваратпӑр, мероприятине пуҫласа 2022 ҫулта йӗркелесе ирттернӗ пӗрремӗш хут.  Ун чухне пирӗн тӑрӑха 15 пин ытла ҫын килсе ҫитнӗ.  2023 ҫулта кӑтарту тата та ӳснӗ, 45 пин ытла ҫын мероприятине хутшӑса хӑйсен кӑмӑлне тултарнӑ.  Кӑҫалхи мероприятине тата та ытларах халӑх пухӑнасси паллӑ.

Чӑваш Республикин ял хуҫалӑх министрӗ – Чӑваш Республикин Министрсен Кабинечӗн Предселателӗн ҫумӗ Сергей Артамонов ҫапларах палӑртса каланӑ хӑйӗн сӑмахӗнче: «Фестивалӗн программине ӗҫлӗ тӗлпулусем кӑна кӗртмен, культура енӗпе те кӑсӑклӑ мероприятисемпе пуянлатнӑ.  Ертӳҫӗсем уҫӑ калаҫусем вӑхӑтӗнче хӑмла лартса ҫитӗнтерессипе ҫыхӑннӑ ҫӗнӗлӗхсем пирки сӳтсе  явӗҫ.  Паянхи куна калас пулсан, хӑмлана ют ҫӗршывсенчен чылай илсе килеҫҫӗ, мӗнпур калӑпӑшран 95 проценчӗ пирӗн марри те куҫ кӗретех.  Апла пулсан, ыйту ҫине ытларах тимлӗх уйӑрмалла, ятарлӑ техникӑсем туянмалла, тавар пахалӑх шайне ӳстерессишӗн специалистсен ырми-канми тӑрӑшмалла», – тенӗ.    

«Раҫҫейӗн симӗс ылтӑнӗ» фестивалӗн тӗп спонсорӗ Россельхозбанк шутланать.  «Канши ялта Чӑваш енре сӑрана халӑх хӑйне евӗр пӗҫерме пӗлет.  Чӑваш халӑхӗн йӑли-йӗркинче сӑра пӗлтерӗшӗ пысӑк пулни те никамшӑн та вӑрттӑнллӑх мар.  Эпир кӑҫалхипе иккӗмӗш ҫул мероприятийӗн тӗп спонсорӗ пулма килӗшрӗмӗр. «Фермерсен шкулӗ» программа шайӗнче хӑмла лартса ҫитӗнтерессипе тата сӑра вӗретме ятарлӑ специалистсене хатӗрлесе кӑларас ыйтусем ҫине пысӑк тимлӗх уйӑрнӑ.  Апла пулсан, пулслӑх пысӑк пулассине пурсӑмӑр та шансах тӑратпӑр», – тесе каланӑ Раҫҫей Ял хуҫалӑх банкӗн Чӑваш Енри филиалӗн директорӗ Ирина Письменская.  

«Раҫҫейӗн симӗс ылтӑнӗ» фестивале туристсем, республика хӑнисемпе Чӑваш Енре пурӑнакансем кӑмӑлласах хутшӑннӑ.Унта сӑра астивме те май пулнӑ.