Тӗлпулу Ҫӗрпӳ округӗнчи «Звездный» лагерьте иртнӗ, унта виҫӗ эрне хушшинче 14 ҫултан пуҫласа 17 ҫулчченхи 460 ытла ҫамрӑк курсант  «ВОИН» регион центрӗн хушма вӗрентӳ программипе хӑйсен тавракурӑмлӑхне ӳстереҫҫӗ.

Ҫамрӑк яш-кӗрӗм ҫарпа спорт хатӗрленӗвӗн теорипе практикине ӑша хывса пыраҫҫӗ.  БПЛА управленийӗн ҫӗнӗлӗхӗсене вӗренеҫҫӗ,  тактика хатӗрленӗвӗпе медицина пайӗнчи чи пӗлтерӗшлӗ методикӑсене хӑнӑхса пыраҫҫӗ.  Хӑрушсӑрлӑх темипе ҫыхӑннӑ ыйтусене тишкереҫҫӗ . Курс программине Раҫҫейӗн наци хӑрушсӑрлӑхӗн никӗсӗсене тӗпчессине,  нормативсене пурнӑҫлассине, инкеке лексе сусӑрланнисене пӗрремӗш пулӑшу пама вӗрентессисене те  кӗртнӗ.

Чӑваш Республикин Пуҫлӑхӗ Олег Николаев паллӑ пулӑма пухӑннисене саламланӑ май, ҫапларах палӑртса хӑварнӑ: «Кун пек  мероприяти ӗҫне Чӑваш Республикинче йӗркелесе пуҫарса яни питӗ чаплӑ. Эпир РФ Президенчӗ хушӑвӗсене пурнӑҫа кӗртсе пыратпӑр. Ҫамрӑксене хӑйсен проекчӗсемпе ӗҫлесе пыма хӑтлӑ условисем йӗркелетпӗр», – тенӗ.

Регион Ертӳҫи курсантсен ыйтӑвӗсене хурав панӑ.  Тӗслӗхрен, ҫамрӑксем республикӑра чӑваш чӗлхине малалла та аталантарасси пирки регион Пуҫлӑхӗнчен ыйтса пӗлнӗ. Ҫарта хӗсметре тӑрасси пирки, ГТО нормисене  тултарасси ҫинчен, физкультурӑпа спорт енӗпе ҫыхӑннӑ ыйтусем те кун йӗркинчех тӑнӑ вӗсен.

Ҫулсерен республикӑра ҫарпа патриотизм, ҫамрӑксен ӑс-хакӑл тӗнчине пуянлатса пырассипе  1500 ытла мероприяти иртет.  Авӑн уйӑхӗн  26-мӗшӗнчен пуҫласа 29-мӗшӗччен Чӑваш Ен студентсен шырав пӗрлешӗвӗсен представителӗсем валли Пӗтӗм Раҫҫейри ҫамрӑксен патриотлӑх форумне ирттермелли вырӑн пулса тӑрӗ. Кун пирки Чӑваш  Республикине малтанласа  «Роспатриотцентр» ФГБУ директорӗ Елена Беликова ӗҫлӗ ҫул ҫӳревре пулнӑ чухне калаҫса килӗшнӗ пулнӑ.