Чӑваш Ен тӗп хулин Хисеплӗ гражданинне чысласссипе ҫыхӑннӑ мероприяти  йӑлана кӗнӗ тӑрӑх Хула кунӗ умӗн иртнӗ. Шупашкар хула Пухӑвӗн депутачӗсен йышӑнӑвӗпе килӗшӳллӗн, общество тата политика ӗҫ-хӗлӗнче, Шупашкарӑн экономикӑпа культура аталанӑвне пысӑк тӳпе хывнӑшӑн «Шупашкар хулин Хисеплӗ гражданинӗ» ята Раҫҫей Федерацийӗн Патшалӑх Думин Финанс рынокĕ енĕпе ĕçлекен комитечĕн Председателĕ Анатолий Аксаков тивӗҫлӗ пулнӑ.

Хула Администрацине Шупашкар хулин хисеплӗ гражданинӗсем, Шупашкар хула Пухӑвӗн депутачӗсем, общество ӗҫне хастар хутшӑнакансем пухӑннӑ. Чӑваш Ен Пуҫлӑхӗ пухӑннисене ҫывхарса килекен уявпа – Шупашкар хулин кунӗпе саламланӑ, тӗп хуламӑрӑн аталанӑвне тӳпе хывакансене пурне те тав тунӑ, хисеплӗ гражданина тивӗҫлӗ награда парса чыс тунӑ.

Чӑваш Республикин Пуҫлӑхӗ Олег Николаев ҫапла палӑртса каланӑ: «Анатолий Геннадьевич, сире Чӑваш Ен Правительствипе, администраципе, депутатсемпе тата общественноҫпа пӗрле нумай вӑхӑт хушши тухӑҫлӑ ӗҫленӗшӗн тав тӑватӑп. Хисеплӗ граждансене пурне те уйрӑмах пысӑк тав. Сирӗнтен кашниех хӑй вӑхӑтӗнче хула аталанӑвне курӑмлӑ тӳпе хывнӑ. Ҫавна пула эпир халӗ ҫирӗп тӑратпӑр, ҫак никӗсе сӳтме никама та ирӗк памастпӑр. Ҫапла пулнӑ, яланах ҫапла пулать те», – тенӗ.

Хула пуҫлӑхӗ Владимир Доброхотов Анатолий Аксакова хулана юратнӑшӑн тата унӑн  ыйтӑвӗсене  татса пама пулӑшнӑшӑн тав тунӑ.

Шӑпах та, ҫак паллӑ кун, Чӑваш Ен Пуҫлӑхӗ Олег Николаев Чӑваш Республикин Министрсен Кабинечӗн Председателӗн ҫумне – Чăваш Енĕн РФ Президенчĕ çумĕнчи полномочиллĕ представителне Алексей Ладыкова, Шупашкар хула администрацийӗн пуҫлӑхӗ 2011 ҫултан пуҫласа 2021 ҫулччен пулнӑскере, «Чӑваш Республики умӗнчи тава тивӗҫлӗ ӗҫсемшӗн» орден парса чысланӑ.

Ҫавӑн пекех мероприятире Шупашкар хули умӗнчи тава тивӗҫлӗ ӗҫсемшӗн тата хула 555 ҫул тултарнине палӑртса пысӑк хисепе тивӗҫнисене патшалӑх наградисемпе медальсем панӑ.