Кун пирки Чӑваш Ен Пуҫлӑхӗ Олег Николаев тата Раҫҫей ФСБ республикӑри Управленийӗн пуҫлӑхӗ Альберт Савинцев ертсе пыракан  террора хирӗҫ кӗрешессипе ӗҫлекен комиссийӗн тата Оперативлӑ штабӑн пӗрлехи ларӑвне,  ҫӗнӗ вӗренӳ ҫулӗ тӗлне вӗрентӳ объекчӗсене хӑрушсӑрлӑхпа тивӗҫтерес ыйтӑва  пӑхса тухнӑ май, пӗлтернӗ.

Республикӑра 812 вӗрентӳ организацийӗ ӗҫлет. Вӗсене пурне те 100% чрезвычайлӑ лару-тӑру е пушар сиксе тухсан ҫынсене васкавлӑн пӗлтермелли тата эвакуацилемелли системӑсемпе, пушар сӳнтермелли пӗрремӗш хатӗрсемпе тивӗҫтернӗ. Росгварди подразделенийӗсенче тӑрӑшакансем кулленех сыхӑ тӑраҫҫӗ.  Объектсенче 99,4% видеосӑнав системисене вырнаҫтарӑ.

Маларах вӑл муниципалитетсене хӑрушсӑрлӑхпа тивӗҫтерес тесе, мӗнпур майсемпе туллин усӑ курманнишӗн пӑшӑрханса каланӑ.  Халӑха хӑрушсӑрлӑхпа тивӗҫтересси кулленхи пурнӑҫра чи пӗлтерӗшлисенчен пӗри пулса тӑмаллине те асӑннӑ вӑл.  Тавралӑха тирпей-илем кӗртессипе пӗр танах ытти ыйтусем ҫине те тивӗҫлӗ тимлӗх уйӑрма чӗнсе каланӑ Пуҫлӑх.

Предприятийӗсене, халӑх пурнӑҫне тивӗҫтерекен объектсене, транспорт, коммуникацисемпе ҫыхӑну, энергетика тытӑмӗсене кулленех сыхӑ тӑмалла.  Вӗсем  ҫынсен пурнӑҫӗпе сывлӑхне сиен ан кӳччӗр,  инкек кӑларса ан тӑраччӗр тесен вӗсем ҫине пысӑк тимлӗх уйӑрмалла. Ку ыйтусене те палӑртнӑ ларура, тӗплӗн пӑхса тухнӑ. 

Ҫӗнӗ вӗренӳ ҫулне хатӗрленнӗ май вӗрентӳ объекчӗсене террора хирӗҫ кӗрешессипе епле хатӗрленсе пынипе пыманнине ятарлӑ мониторинг тӑваҫҫӗ.  Инструктажсемпе практика занятийӗсене те ҫивӗч йӗркелесе пыраҫҫӗ.  Пропуск режимне пӑхӑннине тӗрӗслесе тӑрассине вӑйлатма палӑртнӑ.

Оперативлӑ штаб ертӳҫи Альберт Савинцев генерал-майор экстреннӑй службӑсене хӑрушлӑх е чрезвычайлӑ лару-тӑру ӑнсӑртран сиксе тухас пулсан, туххӑмрах хыпарлама хушнӑ. Техника таврашне те ҫителӗклӗ таран хатӗрлесе тӑратма чӗнсе каланӑ.  Йывӑрлӑх кӑларса тӑратма пултаракан пулӑмсенчен кулленех сыхӑ тӑмаллине, тимлӗхе самантлӑха та ҫухатма юраманнине асӑннӑ.

Ҫавӑн пекех ларура,  ҫывхарса килекен авӑн уйӑхӗн 8-мӗшӗнче, Пӗрлехи сасӑлав кунӗнче, халӑха хӑрушсӑрлӑхпа тивӗҫтерес тесе кирлӗ пек мерӑсене пӑхса тухмаллине асӑннӑ.