Кун пирки Чӑваш Республикин Пуҫлӑхӗ Шупашкар хули 555 ҫул тултарнине халалланӑ республикӑн тӗп хулин Хӗрлӗ тӳремӗнче иртнӗ савӑнӑҫлӑ мероприятире пӗлтернӗ.

 «Хӑйӗн 555 ҫулне Шупашкар хули пысӑк улшӑнусемпе кӗтсе илет. Республикӑн тӗп хулинче ҫӗнӗ спорт, культура, вӗренӳ, сывлӑх сыхлав объекчӗсем тӑваҫҫӗ, ҫулсене юсаҫҫӗ, урӑхла каласан, хула ҫамрӑкланать тесен те юрать. Ҫакна эпир, кунта пурӑнакансем, пӗтӗмпех тӑватпӑр», – тесе уйрӑммӑн палӑртса каланӑ хӑйӗн ум сӑмахӗнче Чӑваш Республикин Пуҫлӑхӗ.

«Шупашкарта пурӑнакан 100 ытла тӗрлӗ халӗх пӗре туслӑ пурӑнса, пӗр-пӗрин йӑли-йӗркисене хисеплесе килӗштерсе пурӑнни те куҫ кӗретех.  Чи кирли вара, пӗр чӑмӑра пухӑнса, йывӑрлӑхсене парӑнтарма пӗлни, ҫитӗнӳсем патне ӑнтӑлни. Ҫаксене пурне те ҫынсем яланах ҫывӑх ҫынна, кашни хӑйӗн вырӑнӗнче тӑвакан ӗҫе юратса пурнӑҫа кӗртсе пынӑ.

Мӗн пулнине эпир яланах асра тытатпӑр: пулӑмсем, ӗҫсем, ҫитӗнӳсем, кӑткӑс вӑхӑтсем тата ҫынсем. Эпир хамӑрӑн тӗрлӗ вӑхӑтра пысӑк ӗҫсем тунӑ паллӑ ентешсемпе мӑнаҫланатпӑр. Вӗсем ӑслӑлӑх открытийӗсем тунӑ, космоса ҫитиех вӗҫнӗ.

Эпир Тӑван ҫӗршыва хӳтӗлесе тӗрлӗ  тапхӑрта хӑйсене шеллемесӗрех пуҫӗсене хунисене пурне те асра тытатпӑр. Эпир, хальхи ӑру, Тӑван ҫӗршывӑн Аслӑ вӑрҫи ҫулӗсенче ҫапӑҫнӑ ҫынсене асра тытатпӑр, вӗсемпе мӑнаҫланатпӑр,  яланах вӗсене хисеплесе пуҫ таятпӑр.  Паян та, алла хӗҫ-пӑшал тытса Тӑван ҫӗршыва хӳтӗлекенсемпе мӑнаҫланатпӑр. Ҫӗнтерӳ кунӗ часах ҫиттӗр тесе, кашни хӑй вырӑнӗнче пурне те тӑвать. Чи пӗлтерӗшли вара – эпир хамӑр хулан пуласлӑхӗ – хамӑр алӑра пулнине ӑнланни. Ҫакна эпир  пӗтӗмпех Раҫҫей Федерацийӗн Президенчӗпе  РФ Правительстви пулӑшнипе пӗтӗмпех туса пыратпӑр.  Эпир яланах пӗрле, пӗрне-пӗри пулӑшса кирлӗ пек мӗнпур ӗҫсене туса пыратпӑр», – тенӗ вӑл  

Чӑваш Ен  Пуҫлӑхӗ  ӗҫре хисепе тивӗҫнисене патшалӑх наградисене  парса хавхалантарнӑ.  Жуков ячӗллӗ медале республикӑра ҫуралса ӳснӗ, ятарлӑ ҫар операцине хутшӑннӑ паттӑра парса чыс тунӑ. «Чӑваш Республикин тава тивӗҫлӗ артисчӗ» хисеплӗ ята «Маскарад» театр компанийӗн актерне Анатолий Гущина панӑ. «Шупашкар хулине 555 ҫул» юбилей медалӗпе «Стрижи» пилотаж ушкӑнне ертсе пыракан  Денис Кузнецов полковника парса чысланӑ.

Шупашкар ҫыннисене уяв ячӗпе ҫавӑн пекех Раҫҫей Федерацийӗн Патшалӑх Думин депутачӗ Анатолий Аксаков саламланӑ: «Раҫҫей халӑхӗсен ҫемйинче пурӑнакан хамӑн аслӑ чӑваш халӑхӗпе, республика тата ҫӗршыв историйӗпе мухтанатӑп.  Хамӑрӑн чаплӑ Шупашкар хулин историйӗпе те мӑнаҫланатӑп. Шанатӑп: эпир пӗрле хамӑрӑн юратнӑ хулана тӗнчери чи илемлӗ те чаплӑ хула пулса тӑтӑр тесе тӑрӑшассине!», – тенӗ вӑл.

Раҫҫей Федерацин сенаторӗ Николай Владимиров сӑмаха малалла тӑснӑ май, ҫапла палӑртса каланӑ: «Ҫак уяв мӗнпур  Шупашкар ҫыннисене пӗр чӑмӑра пухать. Тӗрлӗ халӑх яланах пӗр-пӗринпе туслӑ пурӑнать.  Пурсӑмӑр та тӑван халӑх, хамӑрӑн Чӑваш Республикин тӗп хулин социаллӑ пурнӑҫӗпе экономика аталанӑвӗ ҫирӗп пултӑр тесе вӑй хурать.   Тӑван хулана яланах хисеплетӗп, ӑна юратататӑп.  Эпир унӑн нумай ӗмӗрлӗ историйӗпе мӑнаҫланатпӑр, чи лайӑх йӑла-йӗркесене ӑруран-ӑрӑва  куҫарса пыратпӑр. Паян хула хӑвӑрт аталанса ҫирӗпленсе пыни те куҫ кӗретех.  Ҫӗнӗ производствӑсемпе социаллӑ объектсем уҫӑлаҫҫӗ, хальхи  пурнӑҫпа килӗшсе тӑракан микрорайонсем хута кайса пыраҫҫӗ.  Эпӗ Шупашкарта ӳссе кунтах пурӑннӑшӑн мӑнаҫланса хавхаланса пурӑнатӑп. Хула аталанӑвне  тӳпе хывнӑ мӗнпур ҫынна пӗтӗм   чун-чӗререн мухтаса тав сӑмахӗсем калатӑп», – тенӗ вӑл.

«555 ҫул каялла Шупашкар йӗркеленсе тӗпленнӗ.  Вӑл вырӑс патшалӑхӗн кӑнтӑр форпостне кӗрет. Ӗмӗрсем иртнӗ, ҫак хушӑра хулара интереслӗ аслӑ ҫынсем пурӑннӑ, вӗсем те, пирӗн пекех, пирӗн юратнӑ хулана аталантарассишӗн тӑрӑшнӑ.  Шупашкар ҫыннисене телейлӗ пулма сунас килет.  Хула  кулленех аталанса пытӑр,  пирӗн пулас ӑру та яланах унпа мӑнаҫланма пӗлтӗр», – тесе саламланӑ Раҫҫей Федерацийӗн Патшалӑх Думин депутачӗ Алла Салаева.

Чӑваш Ен Патшалӑх Канашӗн Председателӗ Леонид Черкесов хӑйӗн сӑмахӗнче Чӑваш Енӗн тӗп хули республика пекех ҫирӗп те йӗркеллӗн аталанса пынине, экономикӑпа социаллӑ пай ыттисемшӗн чӑн-чӑн тӗслӗхре пулнине асӑннӑ.  Паянхи пурнӑҫ таппинче ҫӗршыв Президенчӗ Владимир Владимирович Путин тавра пухӑнса, пӗр-пӗринпе яланах килӗшсе туслӑ ӗҫлесе пыни те паха тенӗ. Пӗрлӗхре вӑй пулнине яланах асра тытма чӗнсе каланӑ вӑл. Паян эпир пурте тӑван хулана юратнине тепӗр хут ҫирӗплетсе паратпӑр тесе сӑмаха ҫавӑрнӑ вӑл.

Мероприятине ҫавӑн пекех Чӑваш  Республикин Пуҫлӑхӗн Администрацийӗн  Ертӳҫи Вячеслав Борисов, республикӑн ӗҫ тӑвакан влаҫ ертӳҫисем, хула депутачӗсен пухӑвӗн председателӗ Евгений Кадышев, Чӑваш Енӗн ҫар комиссарӗн ҫумӗ Сергей Сергеев, «Паттӑрсен вӑхӑчӗ» программӑна хутшӑннӑ Александр Тихонов полковник тата та ытти сумлӑ хӑнасем пуҫтарӑннӑ.

Республика тӳремӗнче хӑйсен экспозицийӗсене муниципаллӑ округсем: Каҫал ен, Патӑрьел, Вӑрнар, Улатӑр, Вӑрмар, Канаш хули, Куславкка, Муркаш, Красноармейски, Элӗк,  Ҫӗнӗ Шупашкар хули,  Елчӗк, Пӑрачкав, Шӑмӑршӑ, Ҫӗмӗрле, Хӗрлӗ Чутай кӑсӑклӑ хатӗрлесе тӑратнӑ.  Уяв мероприятиӗ анлӑ пулнӑ, курма килекенсем пурте тенӗ пекех кӑмӑллӑ юлнӑ.