Кун пирки Чӑваш Республикин Пуҫлӑхӗ ҫумӗнчи стратеги аталанӑвӗпе проект ӗҫӗ-хӗлӗ енӗпе  тимлекен канаш ларӑвӗнче пӗлтернӗ. Ҫӗртме уйӑхӗнче республикӑра наци проекчӗсен ҫитӗнӗвӗн шайӗ 99,97% танлашнӑ, Раҫҫей Федерацийӗн регионӗсем хушшинче  пирӗн республика 3-мӗш вырӑна тухнӑ, Атӑлҫи федераци округӗнче регион 1-мӗш вырӑнта тӑрать.

 «Эпир хӑвӑртлӑха ӳстертӗмӗр, анчах тата та резервсем пур, вӗсемпе  те малалла  хастар ӗҫлеме пӗлмелле, вӑхӑта вӑраха тӑсма никамӑн та ирӗк пулмалла  мар. Хыпарсен пахалӑх шайне ӳстерни  аван. Ку ыйту ҫине пурин те тимлӗх уйӑрмалла.  Республикӑра пурӑнакансен информацисене вӑхӑтра тата туллин пӗлсе тӑмалла. Хыпарсене кӑсӑклӑ тата халӑха ӑнланмалла калӑплама тӑрӑшмалла.  Регионта пурӑнакан ҫынсен мӗнле объектсем хута кайнине туххӑмрах пӗлмелле.  Халӑхӑн пурнӑҫ условийӗсене лайӑхлатса пырассипе пурнӑҫа кӗрекен объектсем пӗлтерӗшлӗ, апла пулсан вӗсем пирки ҫынсене кулленех пӗлтермелле», – тесе палӑртса каланӑ хӑйӗн сӑмахӗнче  Чӑваш Республикин Пуҫлӑхӗ Олег Николаев.  

Наци проекчӗсене тӗпе хурса 2024 ҫулта 34 объекта тӗпрен ҫӗнетсе улӑштараҫҫӗ.  4 объектӑн строительство ӗҫне тӗпрен туса пӗтернӗ,  3 ФАПа ҫӗнетсе улӑштарнӑ. Шӑмӑршӑ, Патӑрьел округӗсенче шывпа тивӗҫтермелли комплекса тунӑ, Каҫал енре иккӗмӗш тапхӑрпа строительство ӗҫӗсене пурнӑҫласа пыраҫҫӗ. Ҫулталӑк вӗҫлениччен тепӗр 22 объекта хута яма палӑртнӑ.

Шупашкарти «Университетский» микрорайонти шкул, Куславккари культура ҫурчӗ, Элӗк округӗнчи ача-пӑча ӳнер шкулӗ, Канаш округӗнчи поликлиникӑн ҫӗнӗ ҫурчӗ, 9 врач амбулаторийӗ тата пӗтӗмӗшле врач практикисен уйрӑмӗсем, ҫул-йӗр строительствин 5 объекчӗ те планра пур.

Унсӑр пуҫне Улатӑрти, Ҫӗнӗ Шупашкарти, Ҫӗмӗрлери тата 30 общество хутлӑхӗнчи обществӑлла территорисене тирпей-илем кӗртме, Етӗрнери, Шупашкарти тата Куславкка  тӑрӑхӗсенчи 3 музейра  пурлӑхпа техника базине ҫӗнетсе улӑштарма тӗллев лартнӑ. 10 муниципалитет библиотекине модернизацилеме, 5 муниципаллӑ культура учрежденине автоклубсемпе тивӗҫтерме, Комсомольски тата Красноармейски округӗнчи ял культура ҫуртне юсама ӳнер шкулне ҫӗнетме, 2 ача-пӑча технопаркне «Кванториум» уҫма, Ҫӗнӗ Шупашкарти шкулсенче 11 спортзал юсама, сывлӑх сыхлавӗн 10 объектне ҫӗнетсе улӑштарма, медицина оборудованийӗсене туянма, республикӑри онкодиспансерӗн пысӑк технологиллӗ медицина оборудованийӗпе тивӗҫтерме тата та нумай пысӑк калӑпӑшлӑ ӗҫсене тума плана кӗртнӗ.

Ларура 2025-2030 ҫулсенче «Ӗҫ тухӑҫлӑхӗ» тата  «Хӑрушлӑхсӑр паха ҫулсем» нацпроектсене пурнӑҫламалли плансене сӳтсе явнӑ, пӗтӗмлетӳсем тунӑ. Ӗҫлев тухӑҫлӑхӗн сферинчи компетенцисен федераци центрӗн ертӳҫи Дмитрий Минин тата стратеги аталанӑвӗн Департаменчӗн директорӗн ҫумӗ, Раҫҫей Транспорт министерствин ведомство проект офисӗн ертӳҫи Эльза Жебрик ҫӳлерех палӑртнӑ ыйтусемпе калаҫнӑ, республикӑн ҫитӗнӗвӗсем пысӑк пулнине асӑннӑ.