Палӑртнӑ кӑтартусене  Правительство ҫуртӗнче эрнесерен ирттерекен планеркӑра каласа хӑварнӑ, ӑна  яланхи пекех Чӑваш Ен Пуҫлӑхӗ Олег Николаев ирттернӗ.  Канашлӑва пухӑннисем республикӑн социаллӑ пурнӑҫпа экономика аталанӑвӗн малтанхи пӗтӗмлетӗвӗсене пӑхса тухнӑ, 2024 ҫулта кӑрлач – ҫурла уйӑхӗсенче республика бюджетне  епле пурнӑҫлани пирки сӳтсе явнӑ.

Чӑваш Республикин Пуҫлӑхӗ Олег Николаев калаҫӑва пуҫланӑ май, ҫапла палӑртса хӑварнӑ: «Кӑтартусем аван пулнине пурсӑмӑр та куратпӑр. Вӗсем пире ӳлӗмрен те лайӑх ӗҫлесе пыма хавхалантараҫҫӗ.  Анчах та палӑртса хӑвармалла,  укҫа-тенкӗпе пӗлсе тата вӑхӑтра туллин усӑ курма тӑрӑшмалла. Ҫавӑнпа Минфин сӗнӗвне шута илсе, мӗнпур ӗҫсене тарӑн тишкерсе пӑхса тухма ыйтатӑп.  Ӑҫта ҫитменлӗхсем пур,  вӗсене тупса палӑртсан,  пӗтерме тӑрӑшмалла. Ҫулталӑк вӗҫлениччен пурне те пӑхса тухса, кирлӗ пек  йышӑнусем туса хӑвармалла. Наци проекчӗсем ҫине те пысӑк тимлӗх уйӑрмалла», – тенӗ вӑл.

Чӑваш Ен Правительствин вице-премьерӗ, Дмитрий Краснов пӗлтернӗ тӑрӑх, промышленноҫ производствин индексӗ кӑрлач – ҫурла уйӑхӗсенче 2023 ҫулхипе танлаштарас пулсан 120% танлашнӑ, тирпейлекен производствӑсен индексӗ – 122%. Промышленноҫ предприятийӗсем харпӑр хӑй производство таварӗсене 361 млрд тенкӗлӗх тирпейлесе кӑларнӑ, ку 2023 ҫулхинчен 37% нумайрах, тирпейлекен производствӑсен калӑпӑшӗ 140% танлашнӑ.

Ял хуҫалӑх производствин индексӗ I ҫур ҫулта пӗлтӗрхи ҫакӑн пек тапхӑр тӗлне 103,9% танлашнӑ. Кӑрлач – ҫурла уйӑхӗсенче 345,9 пин тонна сӗт тирпейленӗ (2023 ҫулта – 103%) , 73,2 пин тонна аш-какай, 281,5 млн штук ҫӑмарта (113%)  пухса илнӗ.  Строительство енӗпе те ӳсӗм пысӑк: кӑрлач – ҫурла уйӑхӗсенче  ӗҫ калӑпӑшӗ 34,4 млрд тенкӗпе танлашнӑ, 523,1 пин тӑваткал метр ҫурт-йӗр хута яма палӑртса хунӑ. 

Палӑртма кӑмӑллӑ, халӑхӑн ӗҫ укҫи шайӗ те хӑпарнӑ, вӑл  вӑтамран 20,5% ӳснӗ.

Республикӑн харпӑр хӑй тупӑшӗ  чӗрӗк пая яхӑн пысӑкланнине асӑнса хӑварнӑ хӑйӗн сӑмахӗнче Чӑваш Республикин Министрсен Кабинечӗн Председателӗн  пӗрремӗш ҫумӗ – финанс министрӗ Михаил Ноздряков.

 «Республика бюджечӗ тупӑш енӗпе авӑн уйӑхӗн 1-мӗшӗ тӗлне 2023 ҫулхи ҫак тапхӑртипе танлаштарас пулсан  70389,7 млн тенкӗ калӑпӑшпа 11,7% пурнӑҫланнӑ, ҫав шутра харпӑр хӑй (налук тата налук мар) тупӑшӗсемпе – 24,5% ӳснипе 43234,3 млн тенкӗ калӑпӑшӗпе пулни курӑнать» – тесе ӑнлантарнӑ вӑл.

Республика бюджечӗн кӑрлач – ҫурла уйӑхӗсенчи оперативлӑ  кӑтартусене илес пулсан, тӑкаксем 56617,0 млн тенкӗпе е 2023 ҫулхи ҫакӑн пек тапхӑртипе илес пулсан  103,6% танлашнӑ. Республика бюджечӗ авӑн уйӑхӗн 1-мӗшӗ тӗлне 13772,7 млн тенкӗ калӑпӑшлӑ профицитпа пурнӑҫланнӑ, республикӑн патшалӑх парӑмӗ авӑн уйӑхӗн 1-мӗшӗ тӗлне 16101,3 млн тенкӗпе танлашнӑ. Кун пирки те палӑртса хӑварнӑ асӑннӑ министерствӑн ертӳҫи.