Кун пирки Чӑваш Ен Пуҫлӑхӗ Учительсен кунне халалласа ирттернӗ мероприятинче каланӑ.  Паллӑ пулӑма регионти ача садӗнче тӑрӑшакансем, шкулсенче вӑй хуракансем чылайӑн пухӑннӑ.

2023 ҫултан пуҫласа регионти вӗрентӳ пайне тӗрев парасси самай ӳснӗ. Республикӑн пӗрлештернӗ бюджетӗнче вӗрентӳ пайне аталантарса вӑй илтерсе пыма 4,5%  пуҫласа  27,5% таран хӑпартнӑ, калас пулсан вӑл 75 млрд ытла пулать.  2025 ҫул валли те кӑтарту самай пысӑк, вӗренту пайне 31% таран укҫа-тенкӗ виҫине ӳстерме плана кӗртнӗ.

Чӑваш Республикин Пуҫлӑхӗ Олег Николаев сӑмаха пуҫланӑ май, ҫапларах палӑртса каланӑ: «Эпир мӗнпур ӗҫсенчен чи пӗчӗк пайне  кӑна курса халӗ ӗнентӗмӗр.  Калама кӑмӑллӑ, вӗренӳ пайӗ лайӑх аталанса пырать, кӑтартусем пысӑк пулни те ҫакнах ҫирӗплетсе параҫҫӗ.  Паллӑ мӗнпур ӗҫсене пӗтӗмпех, Раҫҫей Федерацийӗн Президенчӗ хушӑвӗсене тӗпе хурса йӗркелесе пынӑ. Ҫӗршыв Ертӳҫи вӗрентӳ пайне пысӑк тимлӗх уйӑрни куҫ кӗретех. Вӑл палӑртнӑ тӗллевсене  Чӑваш Енре пурнӑҫа кӗртессипе курӑмлӑ ӗҫсем туса пыни никамшӑн та вӑрттӑнлӑх мар.  Федераци шайӗнче пӑхса хӑварнӑ проектсене анлӑлатса регион шайӗнче те тӗрлӗ программӑсене йышӑнатпӑр, вӗсене ӗҫе кӗртсе пыратпӑр.  Пӗр сӑмахпа каласан, вӗрентӳ пайне тӗрлӗ енчен вӑй илтерсе пыма тӑрӑшсах ӗҫлетпӗр», - тенӗ вӑл мероприятине пухӑннисене саламланӑ май.  

Калас пулсан, паянхи пурнӑҫ таппинче регионти шкулсене тӗпрен юсав ӗҫӗсене кӑна тумаҫҫӗ, тавралӑха тирпей-илем кӗртессипе те хастар ӗҫлесе пыни куҫ кӗретех.  Вӗренӳ учрежденийӗсенче вӗрентекенсене хӑтлӑ условисем йӗркелесе параҫҫӗ, ачасене тарӑн пӗлӳ пама ҫӗнӗ технологи хатӗрӗсемпе тивӗҫтереҫҫӗ.  Вӗрентӳ пайӗпе пӗр танах, культура, спорт тытӑмӗ те шкулсенче аталанса вӑй илсе пырать.  Чи кирли вара,  ачасене валли кирлӗ пек условисем вӗсен пултарулӑхне аталантарма йӗркелесе тӑратасси.  Тепӗр тесен, ачасем е хулара е ялта вӗренеҫҫӗ, пӗр пек условисем пулни вӗсене малалла та тарӑн пӗлӳ илме, аслӑ шкулсене вӗренме кӗме витӗм кӳрет.  Палӑртма кӑмӑллӑ, ялсенче шкулта вӗренекенсем хуларисемпе пӗр танах тӗрлӗ конкурссенче ӑмӑртса пысӑк кӑтартусемпе палӑрса, малтисен ретӗнче тӑраҫҫӗ.  Патшалӑхӑн пӗрлӗхлӗ экзаменӗсенче пысӑк кӑтартусемпе палӑрни те ҫакнах ҫирӗплетсе парать.

Раҫҫейре ытти регионсен хушшинче, пирӗн Чӑваш Ен  олимпиада кӑтартӑвӗсемпе 17-мӗш вырӑна тухнӑ.  Пӗтӗм Раҫҫейри одимпиадӑсен пӗтӗмлетӗвӗсем тӑрӑх, 15 ача призер ятне ҫӗнсе илнӗ. Тепӗр пысӑк ҫитӗнӳсенчен пӗри – 2024 ҫлта патшалӑхӑн пӗрлӗхлӗ экзаменӗсенче 11-мӗш класра вӗренекен 64 ача 100 балл пухса ыттисемшӗн тӗслӗх пулса тӑнӑ.

Чӑваш Ен Вӗренӳ министерстви час-часах вӗрентекенсене хавхалантарма тӗрлӗ грантсем илме майсем йӗркелесе парать. Пысӑк кӑтартусемпе палӑракан яш-кӗрӗмсене стипендисем парса та хавхалантараҫҫӗ. 2024 ҫулта 11 ҫын Раҫҫей Федерацийӗн премине илме тивӗҫлӗ пулнӑ. 17 ҫул хушшинче 597 вӗрентекен Раҫҫей Федерацийӗн Президенчӗн премине илнӗ.  Ҫулсерен вӗрентекенсен пултарулӑхне хаклама май паракан тӗрлӗ ӑмӑртусем регионта ирттереҫҫӗ, мала тухнисене Чӑваш Ен Пуҫлӑхӗн премине парса хисеп тӑваҫҫӗ.  «Земский учителӗ» федераллӑ программа лайӑх пурнӑҫланать республикӑра. 2020 ҫултан пуҫласа паянхи кунччен республикӑри 32 вӗрентекен  1 млн илсе пурӑнмалли ҫурт-йӗр условийӗсене лайӑхлатнӑ.