«Шурӑ чулсем» кану центрӗнче кӑҫал вӗренӳ процессне пӗр  чармасӑрах, ачасен сывлӑхне ҫирӗплетсе пыма, тавра курӑмлӑха аталантарма май паракан проект пурнӑҫа кӗртнӗ.  «Губернатор лагерӗ» смена кӑҫал юпа уйӑхӗн 5-мӗшӗнче уҫӑлнӑ. 11-17  ҫула ҫитнӗ хӗрачасемпе каччӑсем вӗренӳпе наукӑра, культурӑра, спортра, обществӗлла ӗҫ-хӗлте хастар хутшӑнса, питӗ пысӑк кӑтартусемпе палӑрнисене 100 ачана командӑсене пухнӑ. 2024–2025-мӗш ҫулсенче пӗтӗмпе  8 смена йӗркелеме плана кӗртнӗ.     

Кун пек проекта пурнӑҫа кӗртни питӗ аван. Ачасен кӑмӑл-туйӑмне, ӑс-хакӑл тӗнчине пуянлатма май парать.  Ҫакнашкал проектсене регионта   «Росинка», «Лесная сказка», «ВОИН» центрсенче те йӗркелесе яма плана кӗртнӗ.   Кун пирки те ырӑ хыпара пӗлтернӗ Чӑваш Республикин Пуҫлӑхӗ Олег Николаев.

Ачасене вӗрентме кӑсӑклӑ программа хатӗрленӗшӗн, республика Пуҫлӑхӗ  Чӑваш Ен Вӗренӳ министерствине, Спорт министерствине, «Артек» МДЦ тӑрӑшкансене мухтаса тав сӑмахӗсем каланӑ.  Пӗр сӑмахпа каласан, ачасен пултарулӑхне аталантарса пыма кирлӗ пек мӗнпур условисене йӗркелесе ҫитернӗ.  Пурӗ тӑватӑ класс хута янӑ, вӑл пӳлӗмсене паянхи пурнӑҫпа тӳр килсе тӑракан хатӗрсемпе тивӗҫтернӗ.

«Кун пек форматпа ачасем пуҫласа канаҫҫӗ. 2020 ҫулта каннӑ ачасем  пачах та урӑхла паян ку центрта пулнине ҫирӗплетеҫҫӗ.  Эпир вара, ҫӗршыв Президенчӗ палӑртнӑ тӗллевсене пурнӑҫа кӗртессишӗн пӗтӗмпех хамӑртан мӗн килнине туса пама тӑрӑшрӑмӑр.  Ачасен кану лагерӗсене кӑна мар, физкультурӑпа спорт центрӗсене те тӗпрен ҫӗнетсе улӑштарса пыратпӑр.  Пӗр сӑмахпа каласан тӗнче шайӗнчи стандартсене пӑхӑнса, кирлӗ пек мӗнпур условисене туса пама тӑрӑшатпӑр.  Калӑпӑр, «Артек» кану центрӗпе пӗр тан пирӗн тӑрӑхри центрсем тӳр килсе тӑни те никамшӑн та вӑрттӑнлӑх мар.   Ачасен канӑвӗ усӑллӑ пултӑр тесе, ҫав тери кӑсӑклӑ мероприяти йӗркеленӗ.  Ҫулталӑкӗпех кунта ачасен сывлӑхне ҫирӗплетме май пур», – тесе уйрӑммӑн палӑртса каланӑ хӑйӗн сӑмахӗнче Чӑваш Республикин Пуҫлӑхӗ Олег Николаев.

Сумлӑ хӑнасемпе пӗрле Олег Николаев  ачасене ырӑ сунса капсула хунӑ, канма килнӗ хӗр ачасемпе арҫын ачасем  Чӑваш Ен Пуҫлӑхне галстук асӑнмаллӑх парне парса чыс тунӑ, кашни вӑл галстука алӑ пуса ҫирӗплетнӗ.