2024 ҫулта Чӑваш Республикинчи «Чи лайӑх патшалӑх граждан служащийӗ» тата «Чи лайӑх муниципалитет служащийӗ» конкурссене хӑйсен ӗҫӗсене патшалӑх служащийӗ – 7 тата 18 муниципалитет служащийӗ тӑратнӑ.

Чӑваш Республикин Пуҫлӑхӗ Олег Николаев ӑмӑртӑва хутшӑннисене саламланӑ май, ҫапларах палӑртса каланӑ: «Конкурс йӑлана кӗнӗ пирӗн, вунӑ ҫул ытла иртет ӗнтӗ. Пурнӑҫ кӑна мар, патшалӑх управленийӗн тытӑмӗ те хӑвӑрт улшӑнса пынине куратпӑр. Цифрӑллӑ сервиссемпе платформӑсене тӗпе хурса ӗҫ пахалӑхӗн шайӗ те лайӑхланса пыни куҫ кӗретех.  Ҫак улшӑнусем ҫӗнӗ пӗлӳпе, паянхи пурнӑҫ таппипе тӳр килсе ӗҫлеме хистеҫҫӗ.  Кулленех ӑс-хакӑл тӗнчине пуянлатмалла.  Кулленхи хӑнӑхусене  тӗпрен ҫӗнетсе пыма вӗренес ыйту та кун йӗркинчех тӑрать», – тенӗ вӑл.

Патшалӑх пулӑшӑвӗпе халӑха усӑ курма меллӗ условисем йӗркелесе тӑратас ыйту та пӗлтерӗшлӗ пулса тӑрать.

Чӑваш Республики наци  проекчӗсемпе ӗҫлесе пынипе ыттисемшӗн тӗслӗхре, ҫӗршывра 9-мӗш  вырӑн йышӑнни те ҫакнах ҫирӗплетсе парать.    Халӑхӑн пурнӑҫ условийӗн шайне улӑштарса пырас ӗҫе яваплӑха туйса, тӳрӗ кӑмӑлпа, саккунсене пӑхӑнса ӗҫлекенсене чун-чӗререн тухакан тав сӑмахӗсем каланӑ регион Пуҫлӑхӗ.

 «Чӑваш Республикинчи чи лайӑх патшалӑх граждан служащийӗ» конкурс ҫӗнтерӳҫин ятне Олеся Игнатьева, Чӑваш Республикин сывлӑх сыхлав министрӗн ҫумӗ тивӗҫлӗ пулнӑ.  

Иккӗмӗш вырӑна Наталия Нанакова, Чӑваш Республикин юстици ӗҫӗсен патшалӑх службин консультанчӗ йышӑннӑ.

Чӑваш Республикин Патшалӑх ҫурт-йӗр инспекцийӗн пурӑнмалли ҫурт-йӗрпе коммуналлӑ пулӑшу ӗҫӗсемшӗн тӳлевсен тӗрӗслев пайӗн аслӑ патшалӑх ҫурт-йӗр инспекторӗ Татьяна Порфирьева виҫҫӗмӗш вырӑн йышӑннӑ.

 «Чӑваш Республикинче чи лайӑх муниципалитет служащийӗ» конкурсра 2024 ҫулта Шупашкар муниципаллӑ округӗн администраци пуҫлӑхӗн ҫамрӑксемпе ӗҫлекен канашҫи Елена Антонова ҫӗнтернӗ.

2-мӗш вырӑна Красноармейски муниципаллӑ округӗн администрацийӗн территорийӗсене тирпей-илем кӗртессипе тата аталантарассипе ӗҫлекен управленийӗн Мӑн Шетмӗри территори пайӗн пуҫлӑхӗ Галина Иванова пуҫаруллӑ бюджета хутшӑнтарас тӗлӗшпе халӑха ӗҫ йӗркелемелли проектпа мала тухнӑ.

Ҫӗмӗрле хула администрацийӗн пай пуҫлӑхӗ Лариса Краснова хисеплӗ 3-мӗш вырӑна тухнӑ. ЗАГС пайӗн ӗҫчешӗсен ӗҫ тухӑҫлӑхӗ ӳсни пирки тӗплӗн каласа кӑтартнӑ хӑйӗн проектӗнче.

Конкурса хутшӑнакансем территорисене тирпей-илем кӗртессипе, муниципалитет округӗсене экономикӑна ӑнӑҫлӑ аталантарассипе тата вырӑнти хӑй тытӑмлӑх органӗсен финанс ресурсӗсемпе тухӑҫлӑ усӑ курассипе, территорие аталантарассине тытса пырассин формисемпе меслечӗсене лайӑхлатассипе, халӑха тата вырӑнти хӑй тытӑмлӑхӑн должноҫри органӗсен шанӑҫ хутшӑнӑвӗн тытӑмне йӗркелессипе ҫыхӑннӑ ӗҫсене  тарӑн сӳтсе явнӑ, пӗр-пӗрин паха ӗҫ опычӗсемпе паллашнӑ.

Конкурс ҫӗнтерӳҫисен проект ӗҫӗсене практика ӗҫӗ-хӗлӗнче усӑ курма  тӗллев лартнӑ.